علی گڑھ، 30 ستمبر (ہ س)۔ علی گڑھ مسلم یونیورسٹی کے یو جی سی مالویہ مشن ٹیچر ٹریننگ سینٹر (ایم ایم ٹی ٹی سی) کے زیر اہتمام فیکلٹی ڈیولپمنٹ کے دو پروگرام منعقد کئے گئے جن میں ملک کی مختلف یونیورسٹیوں اور کالجوں سے تعلق رکھنے والے 153 اساتذہ نے شرکت کی۔
اختتامی اجلاس کی صدارت کرتے ہوئے اے ایم یو وائس چانسلر پروفیسر نعیمہ خاتون نے پروگراموں کی تکمیل پر شرکاء کو مبارکباد دی اور قومی تعمیر میں اساتذہ کی تربیت اور پیشہ ورانہ ترقی کے کردار پر زور دیا۔ انہوں نے کہا کہ اساتذہ تاحیات تعلیم، جدت طرازی اور علمی برتری کے بنیادی ستون ہیں۔
مہمان خصوصی، راجا مہندر پرتاپ سنگھ یونیورسٹی، علی گڑھ کے رجسٹرار پربدھ سنگھ نے عصری تعلیمی چیلنجوں سے نمٹنے میں اساتذہ اور اعلیٰ تعلیمی اداروں کے بدلتے ہوئے کردار پر اظہار خیال کیا۔ انہوں نے کہا کہ ترقی یافتہ ہندوستان کا تصور ایسے کلاس رومز کے ذریعے حقیقت میں بدلے گا جو ہمہ جہت تعلیم کے لیے پُرعزم ہوں۔
علی گڑھ مسلم یونیورسٹی کے شعبہ تعلیم کی چیئرپرسن پروفیسر نکہت نسرین نے مصنوعی ذہانت اور مشین لرننگ سے تیزی سے متاثر ہونے والے دور میں تعلیم کو درپیش چیلنجوں پر گفتگو کی۔ انہوں نے اس بات پر زور دیا کہ تدریس، تعلیم اور تحقیق میں اساتذہ کا کردار بدستور بنیادی اہمیت کا حامل رہے گا، کیونکہ ان کی ذمہ داری صرف علم کی منتقلی تک محدود نہیں بلکہ طلبہ کو متحرک کرنے کی بھی ہے۔
یو جی سی مالویہ مشن ٹیچر ٹریننگ سینٹر کی پروگرام ڈائریکٹر ڈاکٹر فائزہ عباسی نے مہمانوں اور شرکاء کا خیرمقدم کیا۔ انہوں نے یو جی سی مالویہ مشن ٹیچر ٹریننگ سینٹر میں شرکاء کو فراہم کیے جانے والے تعلیمی ماحول کا ذکر کیا۔
شرکاء نے اپنے تجربات بھی بیان کیے۔
لوہا گھاٹ، چمپاوت کے ڈاکٹر کشور چندر جوشی اور سدھر والی کی ڈاکٹر پونم ڈھل نے ریفریشر کورس کے بارے میں اظہار خیال کیا، جبکہ بڑوت، باغپت کی ڈاکٹر ارچنا سنگھ اور جونپور کے مسٹر سوربھ کمار دوبے نے فیکلٹی انڈکشن پروگرام سے متعلق اپنے تجربات بیان کیے۔
شرکاء نے پروگراموں کے علمی اور تجرباتی اجزاء کو سراہا، جن میں علی گڑھ مسلم یونیورسٹی کیمپس، مولانا آزاد لائبریری اور میوزیم کے مطالعاتی دورے، تفریحی سرگرمیاں، جسمانی صحت کی سہولیات، شامِ غزل، انگریزی، ہندی اور اردو زبان میں اختیاری مہارت کی کلاسیں اور گھریلو ملاقاتوں کے ذریعے اے ایم یو کے اساتذہ کے ساتھ ثقافتی تبادلہ شامل تھا۔
انہوں نے پیشہ ورانہ تدریسی ویڈیوز تیار کرنے کے لیے ڈیجیٹل تعلیمی اسٹوڈیو کے استعمال کو بھی نمایاں کیا۔
رہائشی شرکاء نوین کمار، امرسنگھ کالج، لکھاوتی، بلندشہر، اور محترمہ صائمہ احسن، شعبہ اوپٹیمیٹری، پیرا میڈیکل کالج، علی گڑھ مسلم یونیورسٹی کو کتب خانے سے مؤثر استفادہ کرنے پر اعزاز سے نوازا گیا۔
آن لائن فیکلٹی انڈکشن پروگرام-26 کے کورس کوآرڈینیٹر پروفیسر اے آر قدوائی نے فیکلٹی انڈکشن پروگرام کے شرکاء میں اسناد تقسیم کیں، جبکہ ہائبرڈ طریقہ کار سے منعقدہ ریفریشر کورس کی کوآرڈینیٹر پروفیسر نسرین نے ریفریشر کورس کے شرکاء میں اسناد تقسیم کیں۔ اے ایم یو کے مرکز برائے فروغ تعلیم و ثقافتِ مسلمانانِ ہند(سیپی کیمی)میں شعبہ انگریزی کے اسسٹنٹ پروفیسر ڈاکٹر حارث بن منصور نے پروگرام کی نظامت کی اور اظہارِ تشکر کیا۔
ہندوستھان سماچار
---------------
ہندوستان سماچار / سید کامران علی گڑھ
