نئی دہلی، 30 ستمبر (ہ س)۔ ستمبر کے آخری دن آج گھریلو شیئر بازار میں زبردست اتار چڑھاؤ جاری رہا۔ آج کاروبار کی شروعات کمزوری کے ساتھ ہوئی تھی۔ دن کے کاروبار میں خریداری کی حمایت سے سینسیکس اور نفٹی دونوں اشاریے اچھی تیزی حاصل کرنے میں کامیاب رہے، لیکن یہ مضبوطی دن کے دوسرے سیشن میں برقرار نہ رہ سکی۔ دوپہر 1:30 بجے کے بعد ہر طرف سے فروخت شروع ہونے کی وجہ سے دونوں اشاریے اپنی تمام تیزی گنوا کر سرخ نشان میں پہنچ گئے۔ پورے دن کے کاروبار کے بعد سینسیکس 0.07 فیصد اور نفٹی 0.42 فیصد کی کمزوری کے ساتھ بند ہوئے۔ بازار کی کمزوری کے باعث سرمایہ کاروں کو آج 2.03 لاکھ کروڑ روپے (عارضی) کا نقصان ہوا۔

بی ایس ای کا سینسیکس آج 87.92 پوائنٹس یعنی 0.12 فیصد کی گراوٹ کے ساتھ 72,441.15 پوائنٹس کی سطح پر کھلا۔ کاروبار شروع ہونے کے بعد خریداروں نے خریداری کا زور بنایا، جس سے یہ اشاریہ کچھ ہی دیر میں سنبھل کر سبز نشان میں پہنچ گیا۔ دوپہر دو بجے سے کچھ پہلے بازار پر مندی کے رجحان کے حامل سرمایہ کار حاوی ہوگئے، جس کی وجہ سے اس اشاریے کی رفتار کمزور پڑنے لگی۔ اس کے بعد خریداروں نے ایک بار پھر خریداری کا زور بنایا، جس سے یہ اشاریہ دن کی نچلی سطح سے 110 پوائنٹس سے زیادہ سنبھل کر 48.78 پوائنٹس یعنی 0.07 فیصد کی گراوٹ کے ساتھ 72,480.29 پوائنٹس کی سطح پر بند ہوا۔

سینسیکس کی طرح این ایس ای کے نفٹی نے بھی آج 51.20 پوائنٹس یعنی 0.23 فیصد کی کمزوری کے ساتھ 22,665 پوائنٹس کی سطح سے کاروبار شروع کیا۔ شیئروں کی مسلسل فروخت کی وجہ سے شام تین بجے سے کچھ پہلے یہ اشاریہ دن کی بلند ترین سطح سے 214.15 پوائنٹس گر کر 121 پوائنٹس یعنی 0.53 فیصد کی گراوٹ کے ساتھ 22,595.20 پوائنٹس کی سطح پر آ گیا۔ تاہم آخری وقت میں انٹرا ڈے سیٹلمنٹ کی وجہ سے ہونے والی معمولی خریداری کی حمایت سے نفٹی دن کی نچلی سطح سے تقریباً 25 پوائنٹس سنبھل کر 95.75 پوائنٹس یعنی 0.42 فیصد کی کمزوری کے ساتھ 22,620.45 پوائنٹس کی سطح پر بند ہوا۔

آج دن بھر کے کاروبار کے دوران میٹل، کنزیومر ڈیو ریبلز اور فارماسیوٹیکل شعبوں کے شیئروں میں مسلسل فروخت کا رجحان رہا۔ اس فروخت کی وجہ سے بی ایس ای کا ہیلتھ کیئر انڈیکس 2.35 فیصد ٹوٹ گیا۔ اسی طرح بی ایس ای کا کنزیومر ڈیو ریبل انڈیکس 1.43 فیصد گر گیا، جبکہ بی ایس ای کے میٹل انڈیکس نے 1.24 فیصد کی گراوٹ کے ساتھ آج کے کاروبار کا اختتام کیا۔ اس کے علاوہ کیپٹل گڈز اور ایف ایم سی جی انڈیکس بھی گراوٹ کے ساتھ سرخ نشان میں بند ہوئے۔

دوسری جانب، ریئلٹی، میڈیا اور بینکنگ شعبوں کے شیئروں میں آج مسلسل خریداری ہوتی رہی۔ اسی طرح آئی ٹی، آٹوموبائل، پبلک سیکٹر انٹرپرائز اور آئل اینڈ گیس انڈیکس بھی مضبوطی کے ساتھ سبز نشان میں بند ہوئے۔ براڈر مارکیٹ میں بھی آج مجموعی طور پر خریداری کا زور رہا۔ خریداری کی حمایت کے باوجود اتار چڑھاؤ کا سامنا کرنے کے بعد بھی نفٹی کا مڈ کیپ انڈیکس 0.02 فیصد کی معمولی مضبوطی کے ساتھ بند ہونے میں کامیاب رہا۔ اسی طرح اسمال کیپ انڈیکس نے 0.27 فیصد کی تیزی کے ساتھ آج کے کاروبار کا اختتام کیا۔

آج شیئر بازار میں آئی گراوٹ کے باعث اسٹاک مارکیٹ کے سرمایہ کاروں کی دولت میں دو لاکھ کروڑ روپے سے زیادہ کی کمی ہوگئی۔ بی ایس ای میں لسٹڈ کمپنیوں کی مارکیٹ کیپٹلائزیشن آج کے کاروبار کے بعد گھٹ کر 471.79 لاکھ کروڑ روپے (عبوری) رہ گئی۔ جبکہ گزشتہ کاروباری دن یعنی منگل کو ان کی مارکیٹ کیپٹلائزیشن 473.82 لاکھ کروڑ روپے تھی۔ اس طرح سرمایہ کاروں کو آج کے کاروبار سے تقریباً 2.03 لاکھ کروڑ روپے کا نقصان ہوا۔

ہندوستھان سماچار

---------------

ہندوستان سماچار / عبدالواحد