آئیچی-ناگویا، 29 ستمبر (ہ س)۔ ہندوستان کی قومی ریکارڈ ہولڈر پوجا نے ایشیائی کھیل-2026 میں خواتین کی اونچی چھلانگ کے مقابلے میں کانسے کا تمغہ جیت کر تاریخ رقم کردی۔

پوجا نے فائنل میں 1.84 میٹر کی بہترین چھلانگ لگا کر تیسری پوزیشن حاصل کی۔ خواتین کی اونچی چھلانگ میں یہ 24 سال بعد ہندوستان کا پہلا ایشیائی کھیل تمغہ ہے۔

ازبکستان کی سیفولّائیوا نے 1.90 میٹر کی ذاتی بہترین چھلانگ کے ساتھ سونے کا تمغہ جیتا، جبکہ قازقستان کی کرسٹینا اووچنیکووا نے 1.87 میٹر کی کوشش کے ساتھ چاندی کا تمغہ اپنے نام کیا۔

پوجا نے رواں سال کے آغاز میں ایشیائی انڈر-20 ایتھلیٹکس چیمپئن شپ میں 1.93 میٹر کی چھلانگ لگا کر سہانا کماری کا 14 سال پرانا قومی ریکارڈ توڑا تھا۔ ایشیائی کھیل کے فائنل میں بھی 1.84 میٹر کی چھلانگ لگانے کے بعد وہ کچھ وقت تک سرفہرست رہی تھیں۔

تاہم، 19 سالہ پوجا 1.87 میٹر کی اونچائی کو تینوں کوششوں میں عبور نہیں کر سکیں اور انہیں کانسے کے تمغے پر اکتفا کرنا پڑا۔

خواتین کی اونچی چھلانگ میں ہندوستان نے اس سے قبل 2002 کے ایشیائی کھیل میں بوبی ایلوسیئس کے چاندی کے تمغے کی صورت میں تمغہ جیتا تھا۔ اس کے بعد اس مقابلے میں یہ ہندوستان کا پہلا ایشیائی کھیل تمغہ ہے۔

ہندوستھان سماچار

---------------

ہندوستان سماچار / عبدالواحد