فریدآباد، 27 ستمبر (ہ س)۔ سائبر جرائم پیشہ افراد کے خلاف فریدآباد پولیس کی کارروائی مسلسل جاری ہے۔ اسی سلسلے میں پولیس ڈپٹی کمشنر ہیڈکوارٹر ہمدری کوشک کی قیادت میں فریدآباد پولیس کے تینوں سائبر تھانوں کی ٹیموں نے 19 سے 25 ستمبر کے درمیان ایک ہفتے کے دوران مؤثر کارروائی کرتے ہوئے 67 سائبر جرائم پیشہ افراد کو گرفتار کیا ہے۔ اس دوران ملزمان سے 20 لاکھ 33 ہزار 500 روپے کی رقم برآمد کی گئی، جبکہ سائبر فراڈ سے متعلق شکایات پر کارروائی کرتے ہوئے 10 لاکھ 67 ہزار 302 روپے کی رقم مختلف بینک اکاؤنٹس میں منجمد کرائی گئی ہے۔

پولیس ترجمان نے بتایا کہ تینوں سائبر تھانوں کی ٹیموں نے مجموعی طور پر 15 معاملات میں 67 سائبر جرائم پیشہ افراد کو گرفتار کیا ہے۔ ان میں سائبر تھانہ این آئی ٹی کے 6 معاملات، سائبر تھانہ سینٹرل کے 4 اور سائبر تھانہ بلبھ گڑھ کے 5 معاملات شامل ہیں۔ اس کے علاوہ سائبر پولیس ٹیموں نے 500 شکایات کا بھی نپٹارہ کیا ہے۔ یہ کارروائی 19 ستمبر سے 25 ستمبر 2026 کے درمیان ایک ہفتے کے دوران کی گئی۔

گرفتار ملزمان میں مان سنگھ راٹھور، انکت ساہو، شیوا، سورج کمار، منّا لال، مانَو شرما، ابھیشیک، اویش، وکاس، سورج، نکھل کملیش، اشوک سین، وکرم سنگھ، پشپیندر، ستیش، شاہویز انصاری، روہت کمار، نرمان، دشینت پروہت، ونیت پاٹھک وغیرہ شامل ہیں۔

پولیس ڈپٹی کمشنر ہیڈکوارٹر ہمادری کوشک نے عام لوگوں سے سائبر جرائم کے حوالے سے محتاط اور بیدار رہنے کی اپیل کی ہے۔ انہوں نے کہا کہ کسی بھی نامعلوم لنک پر کلک نہ کریں۔ اپنی بینکنگ یا دیگر نجی معلومات کسی کے ساتھ شیئر نہ کریں اور کسی بھی شخص کو او ٹی پی نہ بتائیں۔ بینک یا کوئی بھی مجاز ادارہ فون پر صارفین سے ان کی خفیہ بینکنگ معلومات طلب نہیں کرتا۔

انہوں نے خصوصی طور پر کہا کہ ’ڈیجیٹل اریسٹ‘ جیسی کوئی شق بھارتی قانون میں موجود نہیں ہے۔ اگر کوئی شخص پولیس، سی بی آئی، ای ڈی یا کسی دیگر ایجنسی کا افسر بن کر فون پر ڈرانے یا رقم کا مطالبہ کرنے کی کوشش کرے تو محتاط رہیں اور اس کی باتوں میں نہ آئیں۔

ہندوستھان سماچار

---------------

ہندوستان سماچار / عبدالواحد