کولکاتا، 26 ستمبر (ہ س)۔ ترنمول کانگریس کے رکن پارلیمنٹ کلیان بنرجی نے چیف الیکشن کمشنر گیانیش کمار کو عہدے سے ہٹانے کی اپوزیشن جماعتوں کی کوششوں پر تبصرہ کرتے ہوئے کہا ہے کہ انہیں ہٹانے کی صلاحیت صرف ’کاکروچ جنتا پارٹی‘ (سی جے پی) میں ہے۔ انہوں نے سیاسی جماعتوں، جن میں ان کی اپنی جماعت بھی شامل ہے، کی محدود صلاحیتوں کا بھی ذکر کیا۔کلیان بنرجی نے کہا، ’’اگر سی جے پی حقیقی چیلنج پیش کرتی ہے تو وہ کمار کو ہٹا سکتی ہے۔ کوئی دوسری سیاسی جماعت ایسا نہیں کرسکتی۔‘‘

انہوں نے کہا کہ سی جے پی کسی ایک مسئلے پر پوری طاقت اور مسلسل توجہ کے ساتھ کام کرتی ہے، اس لیے اسے نسبتاً جلد نتیجہ مل سکتا ہے۔ ان کے بقول، ’’اگر سی جے پی ایسا کرتی ہے تو معاملہ جلد حل ہوجائے گا۔ وہ ایک ہی مسئلے پر قائم رہتے ہیں اور پوری لگن سے اسے اٹھاتے ہیں۔‘‘

بنرجی نے مغربی بنگال میں سیاسی جماعتوں کے رہنماؤں کے پارٹی تبدیل کرنے کے معاملے پر بھی تبصرہ کیا۔ انہوں نے کہا کہ اسمبلی انتخابات کے بعد ریاست میں کئی سیاست دانوں کے ایک جماعت چھوڑ کر دوسری جماعت میں شامل ہونے کے واقعات سامنے آئے ہیں۔انہوں نے سول سوسائٹی کی جانب سے مسلسل چلائی جانے والی تحریکوں کا بھی ذکر کیا اور کہا کہ اس طرح کی تحریکوں سے جلد راحت مل سکتی ہے۔

بنرجی کا یہ بیان ایسے وقت میں سامنے آیا ہے جب ایک رپورٹ میں دعویٰ کیا گیا ہے کہ الیکشن کمشنروں سکھبیر سنگھ سندھو اور وویک جوشی نے گزشتہ 10 ماہ کے دوران کم از کم 14 مرتبہ الیکشن کمیشن کے بعض فیصلوں اور احکامات پر باضابطہ اعتراض درج کیا۔ رپورٹ کے مطابق یہ اعتراضات ووٹر فہرست میں نام شامل کرنے، نام حذف کرنے اور بحال کرنے کے علاوہ ووٹر رجسٹریشن کے عمل سے متعلق معاملات پر تھے۔

رپورٹ کے مطابق دونوں الیکشن کمشنروں نے بعض فیصلوں کو ان کی معلومات یا منظوری کے بغیر لیے جانے پر سوال اٹھائے تھے۔ تاہم الیکشن کمیشن کے ذرائع نے ان دعوؤں کو مسترد کرتے ہوئے کہا کہ خصوصی گہری نظرثانی(ایس آئی آر) سمیت کمیشن کے تمام فیصلے تینوں الیکشن کمشنروں کی رضامندی سے اتفاق رائے کے ساتھ کیے گئے ہیں۔

ہندوستھان سماچار

ہندوستان سماچار / Mohammad Khan