کولکاتا، 25 ستمبر (ہ س)۔ خلیج بنگال میں بننے والے کم دباؤ کے باعث مغربی بنگال میں جمعہ کو بھی بارش کا سلسلہ جاری رہے گا۔ ہندوستانی محکمہ موسمیات (آئی ایم ڈی) نے گنگائی مغربی بنگال میں شدید بارش کے ساتھ گرج چمک اور تیز ہواؤں کی وارننگ جاری کی ہے۔ ریاست کے کئی حصوں میں دن بھر مطلع ابرآلود رہنے اور وقفے وقفے سے بارش ہونے کا امکان ہے۔

مشرقی اور مغربی مدناپور، جھارگرام، بانکوڑہ، پرولیا، بیربھوم اور آسنسول سمیت مغربی اضلاع میں بعض مقامات پر گرج چمک کے ساتھ بارش ہو سکتی ہے۔ وشنوپور اور اس کے آس پاس کے علاقوں میں بھی موسم خراب رہنے اور تیز ہواؤں کے ساتھ بارش کی پھوار پڑنے کا امکان ہے۔

جنوبی بنگال کے ہاوڑہ، کولکاتا، شمالی اور جنوبی 24 پرگنہ میں بھی آسمان ابرآلود رہے گا۔ بعض مقامات پر ہلکی سے درمیانی بارش اور گرج چمک کے ساتھ بوندا باندی ہو سکتی ہے۔ کولکاتا میں جمعہ کو ایک دو مرتبہ بارش کے ساتھ 30 سے 40 کلومیٹر فی گھنٹہ کی رفتار سے تیز ہوائیں چلنے کی وارننگ دی گئی ہے۔

جنوبی دیناج پور سمیت شمالی بنگال کے کچھ حصوں میں بھی بارش اور گرج چمک کا اثر برقرار رہ سکتا ہے۔ وہیں سیالدہ اور کولکاتا کے آس پاس کے شہری علاقوں میں بارش کے باعث پانی جمع ہونے اور ٹریفک متاثر ہونے کا خدشہ ہے۔

محکمہ موسمیات کے مطابق جس موسمی نظام کے باعث یہ صورت حال پیدا ہوئی ہے، وہ اب بتدریج کمزور ہو رہا ہے۔ 24 ستمبر کو یہ گہرا دباو جنوبی اڈیشہ اور اس سے متصل شمالی ساحلی آندھرا پردیش کے اوپر موجود تھا اور اس کے بعد اس کے کمزور ہو کر آگے بڑھنے کا امکان ظاہر کیا گیا تھا۔

دیگھہ، مندارمنی کے علاوہ تاج پور، شنکرپور اور آس پاس کے ساحلی علاقوں میں بھی موسم خراب رہنے کا امکان ہے۔ مسلسل بارش اور سمندر میں اونچی لہروں کے پیش نظر ِ سمندر کے ساحلوں پر جانے والے سیاحوں کو احتیاط برتنے کی ضرورت ہے۔ ماہی گیروں کو بھی سمندر میں نہ جانے کا مشورہ دیا گیا ہے۔

آئی ایم ڈی کے سمندری موسمیاتی بلیٹن کے مطابق شمال مغربی خلیج بنگال میں بارش اور گرج چمک کے ساتھ سمندر کی حالت خراب سے انتہائی خراب رہ سکتی ہے اور کچھ وقت کے لیے لہریں بلند ہونے کا امکان ہے۔

ہندوستھان سماچار

ہندوستان سماچار / محمد شہزاد