تہران، 23 ستمبر (ہ س)۔ ایران نے بدھ کی نصف شب سے تہران سے بغداد اور مسقط جانے والی پروازیں منسوخ کر دی ہیں۔ ایسا علاقائی ہوائی اڈوں پر امریکی دباو بڑھنے کے باعث کیا گیا ہے۔ اس دباو کا مقصد ایرانی ایئرلائنز کو بین الاقوامی آپریشنز سے الگ تھلگ کرنا ہے۔ ایران کی شہری ہوابازی کی تنظیم نے کہا کہ عراقی اور عمانی دارالحکومتوں کے لیے پروازیں 23 ستمبر کو مقامی وقت کے مطابق رات 12 بجے سے منسوخ کر دی جائیں گی۔

ایران انٹرنیشنل کی رپورٹ کے مطابق، نیم سرکاری خبر رساں ایجنسی تسنیم نے منگل کو یہ اطلاع دی۔ ایجنسی نے بتایا کہ ایرانی حکام بغداد جانے والی پروازوں کو نجف کی جانب موڑنے کی کوشش کر رہے ہیں۔ تسنیم نے کہا کہ دیگر بین الاقوامی پروازیں، جن میں استنبول جانے والی سروس بھی شامل ہے، مقررہ شیڈول کے مطابق چلیں گی۔

عراق کی شہری ہوابازی سے متعلق اتھارٹی کے ذرائع نے بتایا کہ عراقی حکومت نے حکام کو بدھ کی نصف شب سے بغداد کے لیے ایرانی پروازیں روکنے کا حکم دیا تھا۔ ایران کی شہری ہوابازی کی تنظیم کے ترجمان ماجد اخوان نے بھی کہا کہ مسقط ایئرپورٹ اب ایرانی مسافروں کو قبول نہیں کرے گا اور تہران ان پابندیوں کے حوالے سے عمانی حکام کے ساتھ بات چیت کر رہا ہے۔

ان پروازوں کی منسوخی ایران کے ہوابازی شعبے کے خلاف واشنگٹن کی جانب سے تیز کی گئی مہم کا ابتدائی نتیجہ ہے۔ امریکی وزیر خزانہ اسکاٹ بیسنٹ نے پیر کو کہا تھا کہ ایرانی ایئرلائنز 23 ستمبر سے مؤثر طور پر بین الاقوامی آپریشنز سے باہر ہو جائیں گی۔

انہوں نے ہوائی اڈوں، ایندھن فراہم کرنے والوں، گراؤنڈ ہینڈلنگ کمپنیوں اور دیگر اداروں کو خبردار کیا کہ پابندیوں کی زد میں آنے والی ایرانی ایئرلائنز کو خدمات فراہم کرنے پر ان پر امریکی جرمانے عائد کیے جا سکتے ہیں۔ ایرانی مسافروں کے لیے عراق اہم ہے، کیونکہ لاکھوں افراد ملک میں موجود مقدس مقامات، خاص طور پر نجف اور کربلا کی زیارت کے لیے جاتے ہیں۔ ادھر ٹرکش ایئرلائنز نے مارچ 2027 تک ایران کے لیے اپنی تمام پروازیں روک دی ہیں۔

ہندوستھان سماچار

ہندوستان سماچار / محمد شہزاد