اورنگ آباد ، 16 ستمبر (ہ س) ۔ مراٹھا ریزرویشن کے مطالبات کے لیے ممبئی کے آزاد میدان میں احتجاج کرنے کے لیے انترولی سراتی سے روانہ ہونے والے منوج جراناگے پاٹل کو اب تک ممبئی پولیس نے احتجاج یا بھوک ہڑتال کی اجازت نہیں دی ہے۔ ممبئی پولیس نے آزاد میدان میں منوج جرانگے کے بھوک ہڑتال کرنے کی اجازت سے متعلق درخواست پہلے 2 مرتبہ مسترد کی تھی۔ اس کے بعد منوج جرانگے کی جانب سے تیسری مرتبہ اجازت کے لیے درخواست دی گئی، تاہم اس درخواست پر بھی ممبئی پولیس کی جانب سے اب تک کوئی جواب نہیں دیا گیا ہے۔ممبئی پولیس کے اب تک کے طریقہ کار کو دیکھتے ہوئے امکان ظاہر کیا جا رہا ہے کہ اجازت کے لیے دی گئی تیسری درخواست بھی مسترد ہوسکتی ہے۔ ایسی صورت حال میں منوج جرانگے پاٹل احتجاج کی اجازت کے لیے بامبے ہائی کورٹ سے رجوع کرسکتے ہیں۔ ذرائع کے مطابق وہ اس معاملے میں ہائی کورٹ سے انصاف طلب کرنے کی تیاری کر رہے ہیں۔ منوج جرانگے اس سے پہلے بھی کئی مرتبہ کہہ چکے ہیں کہ انصاف ان کے حق میں ہے۔اس سے قبل جرانگے پاٹل کی جانب سے احتجاج کی اجازت کے لیے 2 مرتبہ درخواست دی گئی تھی، لیکن پولیس نے گزشتہ احتجاج کے دوران پیش آنے والے واقعات کا حوالہ دیتے ہوئے دونوں مرتبہ اجازت دینے سے انکار کردیا تھا۔ اگر جرانگے پاٹل اس معاملے میں بامبے ہائی کورٹ سے رجوع کرتے ہیں تو عدالت میں ہونے والی سماعت پر حکومت اور پولیس کی بھی نظر رہے گی۔ ذرائع کے مطابق منوج جرانگے کے مجوزہ احتجاج کے سلسلے میں ممبئی پولیس کمشنر دیون بھارتی نے ایک خصوصی اجلاس بھی منعقد کیا ہے۔ اس اجلاس میں احتجاج کے دوران تعینات کیے جانے والے پولیس اہلکاروں کی تعداد، اضافی پولیس نفری کی ضرورت اور دیگر ضروری انتظامات کا جائزہ لیا گیا۔ذرائع کا کہنا ہے کہ اگر جرنگے پاٹل اجازت کے لیے بامبے ہائی کورٹ جاتے ہیں اور عدالت کی جانب سے پولیس سے اس بارے میں جواب طلب کیا جاتا ہے تو پولیس گزشتہ احتجاج کے دوران پیش آنے والے واقعات، احتجاج کے دوران قوانین اور شرائط کی ممکنہ خلاف ورزیوں اور تہوار کے دوران احتجاج کی اجازت دیے جانے سے پیدا ہونے والے ممکنہ اثرات کے بارے میں اپنا موقف عدالت کے سامنے رکھ سکتی ہے۔اس معاملے میں اب سب کی نظریں اس بات پر ہیں کہ ممبئی پولیس جرانگے کی تیسری درخواست پر کیا فیصلہ کرتی ہے اور اگر اجازت نہیں ملتی تو منوج جرنگے پاٹل ہائی کورٹ کا رخ کرتے ہیں یا نہیں۔
ہندوستھان سماچار
--------------------
ہندوستان سماچار / جاوید این اے
