جموں, 16 ستمبر (ہ س): عام آدمی پارٹی کے جموں و کشمیر صدر اور ڈوڈہ کے رکن اسمبلی معراج ملک کو ڈوڈہ پولیس نے ایک زیر التوا فوجداری مقدمے میں حراست میں لے کر عدالت میں پیش کیا۔ پولیس کے مطابق یہ کارروائی عدالت کی جانب سے جاری کیے گئے ناقابل ضمانت وارنٹ کی تعمیل میں کی گئی۔پولیس نے واضح کیا کہ معراج ملک کو کسی نئے مقدمے میں گرفتار نہیں کیا گیا بلکہ پرانے زیر التوا مقدمے میں عدالت کے جاری کردہ ناقابل ضمانت وارنٹ کی تعمیل کے لیے حراست میں لیا گیا تھا۔معراج ملک کو چیف جوڈیشل مجسٹریٹ کی عدالت میں پیش کیا گیا، جہاں سماعت کے دوران عدالت نے ان کے خلاف مقدمے میں الزامات طے کر دیے۔ اس کے بعد مقدمے کی ٹرائل کارروائی آگے بڑھنے کی راہ ہموار ہوگئی ہے۔

معراج ملک کی عدالت میں پیشی کے موقع پر ڈوڈہ کورٹ کمپلیکس کے اطراف سیکورٹی کے سخت انتظامات کیے گئے تھے، جبکہ ان کے حامیوں اور مقامی لوگوں کی بڑی تعداد بھی عدالت کے باہر موجود رہی۔قابل ذکر ہے کہ اپریل 2026 میں جموں و کشمیر اور لداخ ہائی کورٹ نے معراج ملک کے خلاف پبلک سیفٹی ایکٹ کے تحت کی گئی احتیاطی حراست کو منسوخ کرتے ہوئے اسے غیر قانونی قرار دیا تھا۔معراج ملک نے 2024 کے جموں و کشمیر اسمبلی انتخابات میں ڈوڈہ اسمبلی نشست سے کامیابی حاصل کی تھی۔ ان کی کامیابی کے ساتھ عام آدمی پارٹی نے جموں و کشمیر میں پہلی مرتبہ اسمبلی میں اپنی نشست حاصل کی تھی۔

ہندوستھان سماچار

---------------

ہندوستان سماچار / محمد اصغر