جموں 16 ستمبر (ہ س): جموں و کشمیر اسمبلی میں قائد حزب اختلاف سنیل شرما نے نیشنل کانفرنس کی زیرقیادت حکومت پر الزام عائد کیا ہے کہ وہ حکمرانی کی ناکامیوں سے توجہ ہٹانے کے لیے ریاستی حیثیت کے معاملے کو استعمال کر رہی ہے۔ شرما نے کہا کہ حکومت کے پاس کام کرنے کے لیے اختیارات اور وسائل موجود ہیں، لیکن ان کا مؤثر استعمال نہیں کیا جا رہا۔ انہوں نے بدعنوانی میں اضافے اور نوجوانوں کو درپیش روزگار کے مسائل پر بھی حکومت کو تنقید کا نشانہ بنایا۔ سنل شرما نے الزام لگایا کہ سرکاری ملازمتوں کی بجائے آؤٹ سورسنگ کے ذریعے روزگار فراہم کیا جا رہا ہے۔ انہوں نے کہا کہ اپوزیشن این ایچ ایم ملازمین، یومیہ مزدوروں اور آنگن واڑی کارکنوں سمیت عوام سے متعلق مسائل کو اسمبلی اور دیگر جمہوری پلیٹ فارمز پر مسلسل اٹھاتی رہے گی۔

انہوں نے مرکز کی جانب سے فراہم کیے جانے والے فنڈز کے زمینی سطح پر مؤثر استعمال نہ ہونے کا بھی الزام لگایا اور پنچایتی راج و اربن لوکل باڈی انتخابات میں تاخیر پر حکومت کو تنقید کا نشانہ بنایا۔قائد حزب اختلاف نے بجلی کے بڑھتے ہوئے نرخوں کو بھی عوام کے لیے اضافی بوجھ قرار دیتے ہوئے کہا کہ اپوزیشن عوامی مسائل پر حکومت کو جوابدہ بناتی رہے گی۔

ہندوستھان سماچار

---------------

ہندوستان سماچار / محمد اصغر