52- ممالک کے نمائندوں سمیت 600 سے زیادہ کمپنیاں شرکت کریں گی

نئی دہلی، 16 ستمبر (ہ س)۔ وزیر اعظم نریندر مودی جمعرات کو صبح تقریبا 10 بجے نئی دہلی کے یشو بھومی میں تین روزہ بین الاقوامی کانفرنس اور نمائش 'سیمیکون انڈیا 2026' کا افتتاح کریں گے۔ وزیر اعظم اس موقع پر اجتماع سے خطاب بھی کریں گے۔ 17 سے 19 ستمبر تک منعقد ہونے والی اس کانفرنس کا موضوع 'سلیکن ٹو سسٹمز: بلڈنگ دی ایکوسسٹم' ہے۔

وزیر اعظم کے دفتر (پی ایم او) کے مطابق، سمٹ پالیسی سازوں، سرمایہ کاروں، محققین، اسٹارٹ اپس، تعلیمی اداروں اور طلباءکو سیمی کنڈکٹر اور الیکٹرانکس ویلیو چین میں عالمی اور ہندوستانی صنعتوں کے ساتھ ایک مشترکہ پلیٹ فارم پر اکٹھا کرے گی۔ اس تقریب کا مقصد ہندوستان میں تعاون، سرمایہ کاری اور اختراع کو فروغ دیتے ہوئے سیمی کنڈکٹر سیکٹر کے لیے ہنر مند افرادی قوت کی ترقی کو تیز کرنا ہے۔

کانفرنس میں سیمی کنڈکٹر کے شعبے کے ساتھ ساتھ ڈسپلے انڈسٹری میں تکنیکی ترقی پر متوازی اجلاس ہوں گے۔ اسٹریٹجک شراکت داری اور مشترکہ منصوبوں کو فروغ دینے کے لیے چھ ملکی گول میز اجلاس منعقد کیے جائیں گے۔ اس کے علاوہ خواتین کی قیادت پر توجہ مرکوز کرنے والے خصوصی اجلاس بھی منعقد کیے جائیں گے۔

سیمیکون انڈیا 2026 سیمی کنڈکٹر ویلیو چین کے تمام اہم مراحل کو مربوط انداز میں پیش کرے گا۔ اس میں سیمی کنڈکٹر مواد اور آلات سے لے کر چپ ڈیزائن، بناوٹ، جدید پیکیجنگ، الیکٹرانکس اور مربوط نظام تک کا پورا عمل شامل ہوگا۔ اس پورے سفر کو ظاہر کرنے کے لیے خصوصی 'سینڈ ٹو سلیکون ٹو سسٹمز' ویلیو چین تجربہ مرکز بنایا گیا ہے۔

منتظمین کے مطابق کانفرنس میں 52 ممالک کے نمائندوں سمیت 600 سے زائد کمپنیاں شرکت کریں گی۔ تقریب کے دوران تقریبا 50,000 شائقین کی آمد متوقع ہے۔ اس کے علاوہ، 400 سے زیادہ اعلی ایگزیکٹوز اور 150 سے زیادہ مقررین مختلف تکنیکی اور اسٹریٹجک اجلاسوں میں اپنے خیالات کا اظہار کریں گے۔

نمائش میں جاپان، جنوبی کوریا، ملیشیا، نیدرلینڈز، سنگاپور اور سویڈن کے خصوصی ملکی پویلین بنائے گئے ہیں۔ اس کے علاوہ 12 ریاستوں کے بوتھ، اسٹارٹ اپ پویلین، انوویشن شوکیس، اسٹوڈنٹ ہیکاتھون اور ورک فورس ڈیولپمنٹ پویلین بھی کانفرنس کا حصہ ہوں گے۔

ہندوستھان سماچار

---------------

ہندوستان سماچار / عبدالسلام صدیقی