شملہ، 15 ستمبر (ہ س)۔ ہماچل پردیش میں مانسون ابھی فعال ہے اور کئی علاقوں میں ہلکی سے درمیانی بارش ہو رہی ہے۔ گزشتہ 24 گھنٹوں کے دوران دھرم شالہ میں سب سے زیادہ 60 ملی میٹر، کوٹھی میں 36.2، سندر نگر میں 28.5 اور بلاسپور میں 23.6 ملی میٹر بارش ریکارڈ کی گئی۔

محکمہ موسمیات کے مطابق 17 ستمبر تک ریاست میں بارش کا سلسلہ جاری رہنے کے امکانات ہیں، جبکہ 18 ستمبر سے مانسون کی رفتار کم ہو جائے گی اور بعض مقامات پر ہلکی بارش ہو سکتی ہے۔ 21 ستمبر تک ریاست میں شدید بارش کا کوئی الرٹ یا انتباہ جاری نہیں کیا گیا ہے۔ اس مانسون سیزن میں اب تک ریاست میں معمول سے 11 فیصد کم بارش ہوئی ہے۔

محکمہ موسمیات کی پیش گوئی کے مطابق 15، 16 اور 17 ستمبر کو ریاست کے بعض مقامات پر بارش ہونے کا امکان ہے۔ 18 سے 21 ستمبر تک بارش کچھ علاقوں تک محدود رہنے کی توقع ہے۔ محکمہ نے ان تمام سات دنوں کے لیے شدید بارش کی کوئی وارننگ جاری نہیں کی ہے۔ ریاست میں اس بار مانسون نے 30 جون کو دستک دی تھی اور عام طور پر ستمبر کے آخر میں اس کی واپسی ہوتی ہے۔

مسلسل بارش کے درمیان زمین کے تودے کھسکنے کے باعث ریاست میں 61 سڑکیں بند ہیں۔ ان میں منڈی ضلع میں سب سے زیادہ 28، کلو میں 12 اور کانگڑا میں 10 سڑکیں متاثر ہیں۔ منڈی ضلع کے دھرم پور، گوہر، سندر نگر اور جوگندر نگر سب ڈویژنوں میں 171 ٹرانسفارمر بند ہونے سے بجلی کی فراہمی متاثر ہوئی ہے۔ چمبا ضلع کے سلونی میں بھی 17 ٹرانسفارمر خراب ہیں۔ شملہ ضلع کے تھیوگ میں پانچ پینے کے پانی کی اسکیمیں متاثر ہوئی ہیں۔

ریاستی ایمرجنسی آپریشن سینٹر کے مطابق 30 جون سے اب تک مانسون کی بارش کے باعث ریاست میں منقولہ اور غیر منقولہ املاک کو تقریباً 3,211 کروڑ روپے کا نقصان ہونے کا اندازہ لگایا گیا ہے۔

مانسون کے دوران بارش سے متعلق حادثات میں اب تک 303 افراد ہلاک ہو چکے ہیں، جبکہ 525 افراد زخمی ہوئے ہیں اور چار افراد لاپتہ ہیں۔

ہندوستھان سماچار

---------------

ہندوستان سماچار / عبدالواحد