کاٹھمنڈو، 30 اگست (ہ س)۔ نیپال میں تباہ کن سیلاب کے بعد جاری راحت اور بچاؤ کی کارروائیوں کے درمیان وزیراعظم بالیندر شاہ نے کہا ہے کہ سیلاب میں لاپتہ ہر شخص کو بچانے کی پوری کوشش کی جائے گی۔ حکومت آخری امید تک تلاش اور بچاؤ کا آپریشن جاری رکھے گی۔ انہوں نے وعدہ کیا کہ سیلاب سے متاثر ہونے والے ہر شخص کی حکومت کی جانب سے بحالی کی جائے گی۔ انہوں نے راحت اور تعمیر نو کے لیے اپنی حکومت کے عزم کو بھی دہرایا۔

’دی کاٹھمنڈو پوسٹ‘ کی رپورٹ کے مطابق، شاہ نے ہفتے کی رات فیس بک پر ایک پوسٹ کے ذریعے قدرتی آفت سے ہونے والی تباہی کی تفصیلات بتائیں۔ انہوں نے کہا کہ رسوا، نواکوٹ اور دھادنگ میں دریاؤں کے نچلے علاقوں میں رہنے والی آبادی بری طرح متاثر ہوئی ہے۔ انہوں نے کہا کہ ’’متاثرہ ہر شہری کی جان بچانا حکومت کی اولین ترجیح ہے۔‘‘

مشکل علاقوں اور خراب موسم کے باوجود جاری تلاش اور بچاؤ کی کارروائیوں کے بارے میں وزیراعظم نے بتایا کہ اب تک 7,500 سے زیادہ افراد کو محفوظ مقامات پر منتقل کیا جا چکا ہے۔ ان میں مختلف پن بجلی منصوبوں کے مقامات پر پھنسے 279 ملازمین بھی شامل ہیں۔انہوں نے کہا کہ اس بڑے امدادی آپریشن میں نیپالی فوج، نیپال پولیس اور مسلح پولیس فورس کے 18,708 اہلکار تعینات ہیں۔ ان کی مدد کے لیے فوجی اور نجی شعبے کے 16 ہیلی کاپٹر بھی استعمال کیے جا رہے ہیں۔ ان ٹیموں نے اب تک 236 بچاؤ آپریشن مکمل کیے ہیں۔ بھارت اور چین کے بین الاقوامی ماہرین بھی زمینی سطح پر امدادی کارروائیوں میں فعال طور پر تعاون کر رہے ہیں۔

خطرناک علاقوں میں کام کرنے والے فرنٹ لائن اہلکاروں کا حوصلہ بڑھانے کے لیے وزیراعظم نے تعینات سکیورٹی اہلکاروں کے یومیہ ناشتے کے الاؤنس اور مراعات میں فوری اضافے کا بھی اعلان کیا۔

شاہ نے بتایا کہ وزیراعظم ریلیف فنڈ میں کمرشل اکاؤنٹس کے ذریعے 5.04 ارب نیپالی روپے اور 18 لاکھ امریکی ڈالر جمع ہوئے ہیں۔ اس کی تفصیلات سرکاری ’ریسکیو ریکویسٹ پورٹل‘ پر عوام کے لیے دستیاب ہیں۔ انہوں نے شہریوں اور عطیہ دہندگان سے اپیل کی کہ وہ دھوکہ دہی سے بچنے کے لیے صرف سرکاری کیو آر کوڈ کے ذریعے ہی عطیات دیں۔وزیراعظم نے بتایا کہ بین الاقوامی سطح پر بھی نیپال کو قابل ذکر امداد ملی ہے۔ اس میں عالمی بینک کی جانب سے 167 ملین امریکی ڈالر کا رعایتی قرض، ایشیائی ترقیاتی بینک (اے ڈی بی) کی جانب سے 5 ملین امریکی ڈالر کی گرانٹ اور 150,000 امریکی ڈالر کی تکنیکی مدد، امریکہ کی جانب سے 500,000 امریکی ڈالر، آسٹریلیا کی جانب سے 1 ملین آسٹریلوی ڈالر اور اقوام متحدہ کے ذریعے سوئٹزرلینڈ کی جانب سے 1 ملین سوئس فرانک شامل ہیں۔انہوں نے کہا کہ بھارت نے 57.5 ٹن ہنگامی طبی اور انسانی امدادی سامان کے ساتھ 2,000 ایئر ٹائٹ باڈی بیگ بھی نیپال پہنچائے ہیں۔ چین بھی اسی طرح کی انسانی امداد اور باڈی بیگ فراہم کر رہا ہے۔ نیپال نے تباہ ہونے والے دریائی پلوں کی مرمت کے لیے چین سے باضابطہ طور پر 30 بیلی پل فراہم کرنے کی درخواست کی ہے۔

وزیراعظم شاہ نے تصدیق کی کہ اب تک آٹھ اضلاع سے 675 لاشیں برآمد کی جا چکی ہیں۔ انہوں نے کہا کہ بچاؤ کی کارروائیوں اور طویل مدتی تعمیر نو کے اہداف مکمل ہونے تک حکومت پوری طاقت کے ساتھ امدادی کاموں میں مصروف رہے گی۔

ہندوستھان سماچار

ہندوستان سماچار / Mohammad Khan