کولکاتا، 23 اگست(ہ س)۔ وزیر دفاع راج ناتھ سنگھ اور وزیر اعلی شبھیندو ادھیکاری نے اتوار کو مغربی بنگال میں گارڈن ریچ شپ بلڈرز اینڈ انجینئرز (جی آر ایس ای) اور ینترا انڈیا لمیٹڈ (وائی آئی ایل) کے پانچ توسیعی منصوبوں کا سنگ بنیاد رکھا۔ تقریبا 3,500 کروڑ روپے کی لاگت کے تخمینے والے ان منصوبوں سے دفاعی پیداوار کی صلاحیت میں اضافہ، جہاز سازی کے شعبے کو تقویت اور ریاست میں صنعتی ترقی میں تیزی آنے کی امید ہے۔

وزیر دفاع نے ملک کی سلامتی کے لیے جنگی جہازوں، بحری جہازوں اور دیگر سمندری پلیٹ فارموں کی تعمیر میں خود انحصاری کی اہمیت پر روشنی ڈالی۔ انہوں نے کہا کہ ہندوستان میں عالمی جہاز سازی کا مرکز بننے کی صلاحیت ہے۔ اس کے لیے ملک میں جہاز سازی کی صلاحیت بڑھانے، گھریلو مینوفیکچرنگ کو مضبوط کرنے اور دفاعی پیداوار میں خود انحصاری کو آگے بڑھانے کی ضرورت ہے۔

راج ناتھ سنگھ نے دفاعی پیداوار کی کامیابی کے لیے معیار، بروقت فراہمی اور بہتر دیکھ بھال اور مرمت کی خدمات کو ضروری قرار دیا۔ انہوں نے کہا کہ ہندوستانی مسلح افواج میں مقامی دفاعی مصنوعات کا استعمال مسلسل بڑھ رہا ہے، جو ملک کی دفاعی صنعت کی بڑھتی ہوئی صلاحیت کی عکاسی کرتا ہے۔

جی آر ایس ای کے تعاون کا حوالہ دیتے ہوئے رکشا منتری نے کہا کہ کمپنی نے حالیہ برسوں میں 100 سے زیادہ جہاز فراہم کیے ہیں اور مستقبل میں ہندوستان کے جہاز سازی کے عزائم میں اہم کردار ادا کر سکتی ہے۔ انہوں نے یہ بھی بتایا کہ جی آر ایس ای جرمنی کے لیے ایک کارگو جہاز بنا رہا ہے، جو ہندوستانی جہاز سازی کی صلاحیت کی بڑھتی ہوئی عالمی شناخت کا اشارہ ہے۔

جی آر ایس ای کے تینوں پروجیکٹ جہاز سازی اور بنیادی ڈھانچے کی صلاحیت میں اضافہ کریں گے۔ کمپنی نے دریائے ہگلی کے دونوں کناروں پر دو چھوٹے شپ یارڈز اور رائچک میں ریور فرنٹ کی 32 ایکڑ زمین کے لیے کولکاتا کی شیاما پرساد مکھرجی پورٹ کے ساتھ لیز کے معاہدے کیے ہیں۔ ان سہولیات سے جنگی جہازوں کے ساتھ ساتھ چھوٹے اور درمیانے درجے کے تجارتی جہازوں کی تعمیر اور مرمت کی صلاحیت میں اضافہ ہوگا۔

ان منصوبوں کے لیے سنگ بنیاد کی تقریبات کھدر پور، شالیمار، رائچک اور ایشاپور میں بیک وقت منعقد کی گئیں۔

ایشاپور میں ینترا انڈیا لمیٹڈ کی میٹل اینڈ اسٹیل فیکٹری میں دو نئی تنصیبات پر 750 کروڑ روپے سے زیادہ کی سرمایہ کاری کی جائے گی۔ جدید ترین صنعتی ٹیکنالوجی اور توانائی کے موثر نظام سے لیس، یہ سہولیات اعلی درجے کی مینوفیکچرنگ صلاحیت کو بڑھانے، درآمدی انحصار کو کم کرنے اور دفاع، ریلوے اور اسٹریٹجک شعبوں کی ضروریات کو پورا کرنے میں مدد کریں گی۔

راج ناتھ سنگھ نے دفاعی پیداوار کے ساتھ ساتھ تحقیق و ترقی اور جدید دھات کاری کے شعبے میں ینترا انڈیا لمیٹڈ کی توسیع کی تعریف کی۔ انہوں نے کہا کہ اس سے اسٹریٹجک مینوفیکچرنگ کی صلاحیتیں مضبوط ہوں گی اور ملک کا درآمدی انحصار کم کرنے میں مدد ملے گی۔

رکشا منتری نے کہا کہ مغربی بنگال میں ان پروجیکٹوں کی شروعات صنعتی ترقی کے ایک نئے مرحلے کی طرف ایک اہم قدم ہے۔ اس سے سرمایہ کاری، روزگار اور اقتصادی ترقی کے نئے مواقع پیدا ہوں انہوں نے داخلی سلامتی سے متعلق معاملات میں ریاستی حکومت کے تعاون کو بھی سراہا اور مغربی بنگال میں ترقی کی نئی رفتار پر اعتماد کا اظہار کیا۔

وزیر اعلی شبھیندو ادھیکاری نے مرکز اور ریاست کے درمیان تعاون کو مغربی بنگال کی ترقی کے لیے اہم قرار دیا۔ انہوں نے امید ظاہر کی کہ بہتر ہم آہنگی سے ریاست کی صنعتی اور اقتصادی ترقی کو مزید تقویت ملے گی۔

حکومت کے مطابق، ان منصوبوں سے براہ راست روزگار کے مواقع میں اضافہ ہونے کے ساتھ ساتھ دفاعی شعبے میں ذیلی اکائیوں اور مائیکرو، چھوٹے اور درمیانے درجے کے کاروباری اداروں کو فائدہ پہنچے گا۔ توقع ہے کہ اس سے مغربی بنگال میں دفاعی مینوفیکچرنگ اور جہاز سازی کے صنعتی ماحولیاتی نظام کو تقویت ملے گی۔

ہندوستھان سماچار

---------------

ہندوستان سماچار / عبدالسلام صدیقی