نئی دہلی، 23 اگست (ہ س)۔

اوڈیشہ کے پارادیپ ساحل سے تقریباً 240 ناٹیکل میل (444 کلومیٹر) دور خلیج بنگال میں ہفتہ کو پناما پرچم بردار مال بردار جہاز ایم وی اوشن وِنر ڈوب گیا۔ جہاز پر 24 عملہ سوار تھا، جن میں 20 چینی شہری، میانمار کے تین شہری اور بنگلہ دیش کا ایک شہری شامل تھا۔ بھارتی کوسٹ گارڈ نے اب تک دو افراد کو بحفاظت بچا لیا ہے، جبکہ باقی افراد کی تلاش جاری ہے۔

یہ جہاز پارادیپ پورٹ سے 1700 ٹن لوہے کا خام مال لے کر سنگاپور جا رہا تھا۔ جہاز 20 اگست کی رات روانہ ہوا تھا اور سمندر میں آگے بڑھتے ہوئے اس سے رابطہ منقطع ہو گیا۔ اس کے بعد بھارتی کوسٹ گارڈ اور بحریہ نے مشترکہ سرچ اینڈ ریسکیو آپریشن شروع کیا۔ سری وجے پورم (سابقہ پورٹ بلیئر) سے دو جہاز روانہ کیے گئے ہیں۔ آس پاس موجود دیگر جہازوں کو بھی الرٹ کر دیا گیا ہے۔

مرکزی وزیر برائے بندرگاہ، جہاز رانی اور آبی گزرگاہیں سربانند سونووال نے ایکس پر لکھا کہ وہ اس واقعے سے کافی فکرمند ہیں۔ تمام ایجنسیاں مل کر امدادی کارروائی چلا رہی ہیں۔ دو افراد کو بحفاظت نکال لیا گیا ہے اور انہیں طبی امداد فراہم کی جا رہی ہے۔

پارادیپ پورٹ اتھارٹی کے ڈپٹی کنزرویٹر کیپٹن الیکھا چرن ساہو نے صحافیوں سے بات کرتے ہوئے کہا کہ وہ جہاز پر سوار تمام افراد کی سلامتی کی امید کر رہے ہیں۔ فی الحال جہاز کے ڈوبنے کی وجہ کا پتہ نہیں چل سکا ہے۔

ہندوستھان سماچار

ہندوستان سماچار / عطاءاللہ