ٹوکیو، 23 اگست (ہ س)۔ ملک کے مشرقی جاپان میں آج رات دو بجے کے بعد علی الصبح دارالحکومت ٹوکیو سمیت کئی مقامات پر زلزلے کے جھٹکے محسوس کیے گئے۔ زلزلے کی شدت ریکٹر اسکیل پر 5.9 درج کی گئی۔ ملک کی محکمہ موسمیات ایجنسی نے کہا کہ سونامی کا کوئی خطرہ نہیں ہے۔ جاپان موسمیاتی ایجنسی کے مطابق، زلزلہ صوبہ اباراکی میں 70 کلومیٹر کی گہرائی میں آیا۔ یونائیٹڈ اسٹیٹس جیولوجیکل سروے نے اس کی ابتدائی شدت 5.8 بتائی۔ اس سے ایک روز قبل دارالحکومت کو موسلادھار بارش کا سامنا کرنا پڑا تھا۔
’جاپان ٹوڈے‘ اور ’دی جاپان نیوز‘ کی رپورٹ کے مطابق، فی الحال زلزلے میں نہ تو کسی کے زخمی ہونے کی اطلاع ہے اور نہ ہی کسی قسم کا نقصان ہوا ہے۔ البتہ وزیر اعظم سنائے تاکائیچی نے ایکس پر کہا کہ حکومت ممکنہ نقصانات کا تخمینہ لگانے کے لیے ایک ٹاسک فورس تشکیل دے رہی ہے۔ زلزلے کے باعث موبائل فونز پر ایمرجنسی پیغامات بھی موصول ہوئے۔ بتایا گیا ہے کہ اس کے بعد ٹوکیو میں تقریباً 460 گھروں کی بجلی گل ہو گئی۔
گزشتہ ماہ، جاپان کے سب سے جنوبی جزیرے کیوشو کے علاقے کماموتو میں 7.1 شدت کا زلزلہ آیا تھا۔ اس سے 38 افراد کی موت ہو گئی تھی اور 364 افراد زخمی ہوئے تھے۔ اس زلزلے سے 1,500 سے زائد عمارتیں زمین بوس ہو گئی تھیں اور تقریباً 20,000 دیگر عمارتوں کو نقصان پہنچا تھا۔
اس سے قبل ہفتہ کی دوپہر ٹوکیو اور آس پاس کے علاقوں میں موسلادھار بارش ہوئی۔ اس کی وجہ سے کئی مقامات پر سڑکوں پر پانی بھر گیا، جن میں اٹاباشی وارڈ بھی شامل ہے۔ اس وارڈ میں فی گھنٹہ 120 ملی میٹر بارش ریکارڈ کی گئی۔ جاپان موسمیاتی ایجنسی نے ٹوکیو اور کانٹو کے لیے سیلاب اور کچھ وقت کے لیے لیول فور کی ایمرجنسی وارننگ جاری کی۔ وارننگ واپس لینے سے پہلے سڑکیں تالاب بن گئیں۔ اس سے قبل اسی ماہ پڑوسی صوبے چیبا اور مشرقی جاپان کے بعض حصوں میں غیر معمولی اور ریکارڈ توڑ بارش ہو چکی ہے۔
ہندوستھان سماچار
---------------
ہندوستان سماچار / انظر حسن
