نئی دہلی، 02 اگست (ہ س)۔

دولتِ مشترکہ کھیل 2026 میں شاندار کارکردگی کا مظاہرہ کرتے ہوئے ملک کا نام روشن کرنے والے بھارتی ویٹ لفٹر اتوار کو وطن واپس پہنچ گئے۔ طلائی تمغہ جیتنے والی میرا بائی چانو سمیت دیگر کھلاڑیوں کا دہلی کے اندرا گاندھی بین الاقوامی ہوائی اڈے پر پرتپاک استقبال کیا گیا۔

بھارتی کھلاڑیوں کے استقبال کے لیے بڑی تعداد میں شائقین پہلے ہی ہوائی اڈے پر موجود تھے۔ جیسے ہی کھلاڑی باہر آئے، پھولوں کے ہار، ڈھول اور نقاروں کے ساتھ ان کا والہانہ خیر مقدم کیا گیا۔

دولتِ مشترکہ کھیلوں میں مسلسل تیسری مرتبہ طلائی تمغہ جیتنے والی میرا بائی چانو نے میڈیا سے گفتگو کرتے ہوئے کہا، میں بہت خوش ہوں کہ میں نے بھارت کے لیے تمغہ جیتا ہے اور مجھے اس پر بے حد فخر ہے۔ میں منی پور سے تعلق رکھتی ہوں، اس لیے مجھے خوشی ہے کہ میں نے اپنے ملک کے لیے کچھ کر دکھایا۔

میرا بائی چانو نے خواتین کے 48 کلوگرام وزن کے زمرے میں مجموعی طور پر 190 کلوگرام وزن اٹھا کر طلائی تمغہ اپنے نام کیا۔ اس کے ساتھ ہی انہوں نے مسلسل تیسرے دولتِ مشترکہ کھیلوں میں طلائی تمغہ جیتنے کا اعزاز بھی حاصل کیا۔

خواتین کے 53 کلوگرام زمرے میں چاندی کا تمغہ جیتنے والی گیانیشوری یادو نے کہا کہ ملک کے لیے تمغہ جیتنا ان کے لیے انتہائی فخر اور خوشی کی بات ہے۔ انہوں نے کہا کہ یہ کامیابی انہیں آئندہ مزید بہتر کارکردگی دکھانے کی ترغیب دے گی۔

خواتین کے 69 کلوگرام زمرے میں چاندی کا تمغہ حاصل کرنے والی ہرجندر کور نے بھی اپنی خوشی کا اظہار کرتے ہوئے کہا کہ ملک کے لیے تمغہ جیت کر انہیں بے حد فخر محسوس ہو رہا ہے۔

مردوں کے 110 کلوگرام سے زائد وزن کے زمرے میں چاندی کا تمغہ جیتنے والے لوپریت سنگھ نے کہا کہ وہ اپنی کارکردگی سے مطمئن ہیں، تاہم اگلے مقابلے میں طلائی تمغہ جیتنے کے ہدف کے ساتھ مزید سخت محنت کریں گے۔

مردوں کے 60 کلوگرام زمرے میں چاندی کا تمغہ جیتنے والے رشیکانت سنگھ نے بھی خوشی کا اظہار کرتے ہوئے کہا کہ ملک کے لیے تمغہ جیت کر واپس آنا بہت اچھا احساس ہے۔

دولتِ مشترکہ کھیل 2026 کی ویٹ لفٹنگ مقابلوں میں بھارت نے ایک طلائی سمیت مجموعی طور پر آٹھ تمغے حاصل کیے ہیں۔ میرا بائی چانو نے خواتین کے 48 کلوگرام زمرے میں طلائی تمغہ جیتا، جبکہ گیانیشوری یادو اور ہرجندر کور نے بالترتیب خواتین کے 53 اور 69 کلوگرام زمروں میں چاندی کے تمغے حاصل کیے۔ اس کے علاوہ رشی کانت سنگھ، راجا متھوپانڈی، ولوری اجے بابو اور لوپریت سنگھ نے بالترتیب مردوں کے 60، 65، 79 اور 110 کلوگرام سے زائد وزن کے زمروں میں چاندی کے تمغے جیتے، جبکہ بندیارانی دیوی نے خواتین کے 58 کلوگرام زمرے میں کانسی کا تمغہ اپنے نام کیا۔

بھارت کے کھاتے میں اب تک مجموعی طور پر 39 تمغے آ چکے ہیں، جن میں 13 طلائی، 17 چاندی اور 9 کانسی کے تمغے شامل ہیں۔

ہندوستھان سماچار

ہندوستان سماچار / عطاءاللہ