دھنباد، 02 اگست (ہ س)۔

نوجوانوں کے امور اور کھیلوں کی وزارت کے تحت میرا یوا بھارت (مائی بھارت)، دھنباد کی جانب سے اتوار کو آئی آئی ٹی (آئی ایس ایم) دھنباد کے آڈیٹوریم میں نشہ مکت یوا – وکست بھارت سنکلپ ابھیان کے تحت وزیر اعظم نریندر مودی کے ورچوئل خطاب کی براہِ راست نشریات کا اہتمام کیا گیا۔

اس پروگرام میں آئی آئی ٹی (آئی ایس ایم) کے طلبہ و طالبات، مائی بھارت کے رضاکاروں اور یوتھ کلبوں کے اراکین سمیت سیکڑوں نوجوانوں نے شرکت کی۔

اپنے خطاب میں وزیر اعظم نے نوجوانوں سے منشیات سے دور رہنے، صحت مند طرزِ زندگی اپنانے اور قوم کی تعمیر میں فعال کردار ادا کرنے کی اپیل کی۔ انہوں نے کہا کہ منشیات فرد، خاندان اور معاشرے کی ترقی میں ایک بڑی رکاوٹ ہیں اور سال 2047 تک ترقی یافتہ اور منشیات سے پاک بھارت کی تعمیر کے لیے سب کی شمولیت ضروری ہے۔

پروگرام کے دوران تمام شرکاء نے مائی بھارت پورٹل کے ذریعے ڈیجیٹل عہد لیا۔ مائی بھارت، دھنباد کے نائب ڈائریکٹر سوریاکانت کمار نے موجود نوجوانوں کو منشیات سے پاک معاشرے کا حلف بھی دلایا۔

اس موقع پر آئی آئی ٹی (آئی ایس ایم) کے نائب ڈائریکٹر پروفیسر شرت کمار داس سمیت متعدد سینئر اساتذہ اور دیگر افسران بھی موجود تھے۔ مشترکہ طور پر منعقدہ اس پروگرام میں نوجوانوں نے معاشرے کو منشیات سے پاک بنانے اور عوامی بیداری کی مہم چلانے کے اپنے عزم کا اعادہ کیا۔

ہندوستھان سماچار

ہندوستان سماچار / عطاءاللہ