جے ڈی اے نے لوئر روپ نگر میں جے ڈی اے ہائٹس فیز ٹو کے فلیٹس کی الاٹمنٹ کے لیے قرعہ اندازی کا انعقاد کیا

جموں، 15 اگست (ہ س)۔ جموں ڈیویلپمنٹ اتھارٹی (جے ڈی اے) نے لوئر روپ نگر میں جے ڈی اے ہائٹس فیز ٹو کے فلیٹس کی الاٹمنٹ کے لیے قرعہ اندازی کا انعقاد کیا، جس کے ذریعے 85 اہل درخواست گزاروں کو فلیٹس الاٹ کیے گئے۔ جے ڈی اے کے مطابق جے ڈی اے ہائٹس فیز ٹو میں مجموعی طور پر 144 رہائشی فلیٹس تعمیر کیے جا رہے ہیں، جن میں 24 فائیو بی ایچ کے، 48 تھری بی ایچ کے اور 72 ٹو بی ایچ کے فلیٹس شامل ہیں۔ سال 2022 اور 2023 میں لیٹر آف انٹینٹ حاصل کرنے والے 85 اہل درخواست گزاروں نے قرعہ اندازی میں حصہ لیا۔

قرعہ اندازی کے دوران 7 فائیو بی ایچ کے، 41 تھری بی ایچ کے اور 37 ٹو بی ایچ کے فلیٹس الاٹ کیے گئے۔ قرعہ اندازی اہل درخواست گزاروں اور متعلقہ افسران کی موجودگی میں کھلے اور شفاف طریقے سے انجام دی گئی۔جے ڈی اے کی جانب سے کامیاب درخواست گزاروں کو موقع پر ہی الاٹمنٹ لیٹر بھی حوالے کیے گئے۔ اتھارٹی کے مطابق اس اقدام کا مقصد الاٹمنٹ کے عمل میں شفافیت برقرار رکھنے کے ساتھ ساتھ شہریوں کو بروقت اور بہتر خدمات فراہم کرنا ہے۔

جے ڈی اے کے وائس چیئرمین ڈاکٹر روپیش کمار نے کہا کہ اتھارٹی کے الاٹمنٹ عمل میں شفافیت اور منصفانہ طریقہ کار کو بنیادی اہمیت حاصل ہے۔ انہوں نے کہا کہ قرعہ اندازی کے ذریعے ہر اہل درخواست گزار کو مساوی موقع فراہم کیا گیا ہے۔ انہوں نے مزید کہا کہ موقع پر ہی الاٹمنٹ لیٹر جاری کرنا شہریوں کا جے ڈی اے پر اعتماد مضبوط بنانے اور خدمات کی فراہمی میں شفافیت کو یقینی بنانے کی جانب ایک اہم قدم ہے۔ قرعہ اندازی میں شریک درخواست گزاروں نے بھی عمل کو شفاف، منظم اور منصفانہ قرار دیتے ہوئے جے ڈی اے کے اقدام کو سراہا۔

ہندوستھان سماچار

---------------

ہندوستان سماچار / محمد اصغر