عمان، یکم اگست (ہ س)۔
مغربی ایشیا میں بڑھتی ہوئی کشیدگی کے پیش نظر امریکہ نے اپنے شہریوں کے لیے نئی سکیورٹی ایڈوائزری جاری کی ہے۔ اردن کے دارالحکومت عمان میں واقع امریکی سفارت خانے نے کہا ہے کہ خطے کی سکیورٹی صورتحال مسلسل تبدیل ہو رہی ہے اور کسی بھی وقت حالات مزید خراب ہو سکتے ہیں۔ ایسے میں امریکی شہریوں کو غیر معمولی احتیاط برتنے اور ممکنہ سفری رکاوٹوں کے لیے تیار رہنے کی ہدایت دی گئی ہے۔
ایڈوائزری میں کہا گیا ہے کہ پروازوں کی منسوخی، فضائی حدود کی عارضی بندش اور سفری منصوبوں میں اچانک تبدیلی جیسی صورتحال پیدا ہو سکتی ہے۔ خطے میں موجود امریکی شہریوں کو حالات پر مسلسل نظر رکھنے اور ضرورت پڑنے پر وہاں سے نکلنے کی تیاری رکھنے کا مشورہ دیا گیا ہے۔ اسی طرح مغربی ایشیا سے باہر موجود امریکی شہریوں سے بھی اس خطے کے سفر کے فیصلے پر سنجیدگی سے دوبارہ غور کرنے کو کہا گیا ہے۔
امریکی سفارت خانے نے شہریوں کو فوجی تنصیبات، احتجاجی مظاہروں اور ہجوم والے مقامات سے دور رہنے کی ہدایت دی ہے۔ اس کے ساتھ ہی مقامی انتظامیہ کی ہدایات پر عمل کرنے، مقامی خبروں پر نظر رکھنے اور اپنی فضائی کمپنی سے پروازوں کی تازہ ترین معلومات حاصل کرنے کا بھی مشورہ دیا گیا ہے۔
ہندوستھان سماچار
ہندوستان سماچار / عطاءاللہ
