جموں, 09 جولائی (ہ س)۔

شری امرناتھ جی یاترا کے سلسلے میں جمعرات کی علی الصبح آٹھواں قافلہ سخت حفاظتی انتظامات کے بیچ بھگوتی نگر یاتری نیواس جموں سے مقدس امرناتھ گپھا کی جانب روانہ ہوا۔ سرکاری اعداد و شمار کے مطابق اس قافلے میں مجموعی طور پر 8,150 یاتری شامل ہیں۔

حکام نے بتایا کہ 3,445 تیرتھ یاتری بالتل راستے سے جبکہ 4,705 یاتری پہلگام راستے سے روانہ ہوئے۔ یہ قافلہ 334 گاڑیوں پر مشتمل تھا جن میں 175 بسیں، 55 درمیانی درجے کی مسافر گاڑیاں اور 104 ہلکی موٹر گاڑیاں شامل ہیں۔اطلاعات کے مطابق بالتل جانے والا قافلہ رات 2 بج کر 50 منٹ پر روانہ ہوا، جبکہ پہلگام جانے والے قافلے نے صبح 3 بج کر 38 منٹ پر سفر کا آغاز کیا۔

حکام کے مطابق اب تک جموں سے سالانہ یاترا کے لیے روانہ ہونے والے یاتریوں کی مجموعی تعداد 52,816 تک پہنچ گئی ہے۔

ادھر رام بن ضلع اور ملحقہ علاقوں میں رات بھر ہونے والی بارش کے باعث موسم خوشگوار ہو گیا، جس سے حبس میں کمی آئی اور یاتریوں کو بھی راحت محسوس ہوئی۔ بہتر موسم کے سبب جموں-سرینگر قومی شاہراہ پر سفر نسبتاً آرام دہ رہا۔

ٹریفک حکام نے بتایا کہ یاترا کا قافلہ کثیر سطحی حفاظتی انتظامات کے تحت رام بن ضلع سے بخیریت گزر گیا، جبکہ قومی شاہراہ پر عام ٹریفک بھی بغیر کسی بڑی رکاوٹ کے جاری رہی۔

ہندوستھان سماچار

---------------

ہندوستان سماچار / محمد اصغر