شری امرناتھ یاترا : صفائی اور شہری سہولیات کی فراہمی کے لیے جے ایم سی کا خصوصی انتظام

جموں، 08 جولائی (ہ س)۔ شری امرناتھ یاترا کے پیش نظر جموں میونسپل کارپوریشن نے مسلسل بارش کے باوجود تیرتھ یاتریوں کو بہتر شہری سہولیات کی فراہمی کے لیے اپنی سرگرمیاں تیز کر دی ہیں۔ کمشنر جموں میونسپل کارپوریشن ڈاکٹر دیوانش یادو کی ہدایت پر کارپوریشن کا تمام انتظامی اور میدانی عملہ شب و روز خدمات انجام دے رہا ہے۔ اطلاعات کے مطابق شدید بارش کے باوجود صفائی کارکن، فیلڈ عملہ اور کارپوریشن کے افسران سوریہ پتری توی ریور فرنٹ سمیت مختلف مقامات پر تعینات رہ کر صفائی ستھرائی، شہری سہولیات کی بحالی اور یاتریوں کی ہر ممکن مدد کو یقینی بنا رہے ہیں۔

ڈاکٹر دیوانش یادو نے تمام متعلقہ افسران اور فیلڈ عملے کو ہدایت دی ہے کہ خراب موسمی حالات کے باوجود شہری خدمات کی فراہمی میں کسی قسم کی رکاوٹ نہ آنے دی جائے اور یاتریوں کو کسی بھی طرح کی پریشانی سے بچانے کے لیے فوری اقدامات کیے جائیں۔انہوں نے کہا کہ شری امرناتھ جی یاترا کے دوران عوامی خدمت جموں میونسپل کارپوریشن کی اولین ترجیح ہے اور تمام متعلقہ محکمے مکمل مستعدی اور ذمہ داری کے ساتھ اپنی خدمات انجام دے رہے ہیں تاکہ یاتریوں کو صاف، محفوظ اور سہولت بخش ماحول فراہم کیا جا سکے۔

ہندوستھان سماچار

---------------

ہندوستان سماچار / محمد اصغر