نئی دہلی، 31 جولائی (ہ س)۔ جنتر منتر سے 20 جولائی کوشروع ہونے والے ”سنسد چلو“ مارچ کے دوران پھوٹ پڑے تشدد میں زخمی ہونے والے پولیس اہلکاروں کے اہل خانہ پہلی بار کھل کر سامنے آئے ہیں۔ جمعہ کے روز کانسٹی ٹیوشن کلب آف انڈیا میں منعقدہ ایک پریس کانفرنس میں، انہوں نے کہا کہ اب تک پورے واقعہ میں پولیس کے خلاف الزامات اور مظاہرین کے زخمی ہونے پرچرچا ہوئی ہے، کسی نے بھی ڈیوٹی کے دوران زخمی ہونے والے پولیس اہلکاروں اور ان کے اہل خانہ کے درد پر توجہ نہیں دی۔

پریس کانفرنس میں اے سی پی کی اہلیہ اپنیت کور، اے ایس آئی کی بیوی سیما، دہلی یونیورسٹی کی طالبہ کنجل اور زخمی اے سی پی کے بیٹے لکشیہ سنگھ بشت نے اپنے تجربات بتائے۔ ایک ویڈیو پریزنٹیشن بھی دکھائی گئی جس میں دعویٰ کیا گیا کہ تشدد میں 250 سے زائد پولیس اہلکار زخمی ہوئے ہیں۔ لواحقین کے مطابق 110 سے زائد بیریکیڈ، 300 باڈی پروٹیکٹر، 350 ہیلمٹ، 20 لاوڈ اسپیکر، 10 ہینڈ ہیلڈ میٹل ڈیٹیکٹر، ایک ایکسرے بیگیج اسکینر اور 25 سے زائد سرکاری گاڑیوں اور دیگر املاک کو نقصان پہنچا۔

اے سی پی کی بیوی اپنیت کور نے کہا کہ ان کے شوہر کو پارلیمنٹ کی سیکورٹی کے لیے تعینات کیا گیا تھا۔ رات گئے جب وہ زخمی حالت میں گھر واپس آیا تو پورا خاندان گھبرا گیا۔ انہوں نے کہا کہ پولیس نے بھیڑ سے بار بار امن برقرار رکھنے کی اپیل کی لیکن اس کے باوجود پولیس اہلکاروں پر پتھر، بوتلیں، چپل اور دیگر چیزیں پھینکی گئیں۔ ان کے شوہر کا حفاظتی ہیلمٹ مکمل طور پر خراب ہو گیا تھا۔ اپنیت نے کہا، ”ہر یونیفارم کے پیچھے صرف ایک پولیس افسر نہیں، بلکہ انکا پورا خاندان ہوتا ہے۔ اگر ہیلمٹ پر ایک اور پتھر لگ جاتا تو شاید آج میرے شوہر زندہ نہ ہوتے۔“

اے ایس آئی کی بیوی سیما نے بتایا کہ ان کے شوہر 33 سال قبل دہلی پولیس میں بطور کانسٹیبل بھرتی ہوئے تھے۔ 20 جولائی کو انہوں نے فون کرکے اطلاع دی تھی کہ جنتر منتر پر بھیڑ بڑھ رہی ہے اور پارلیمنٹ مارچ کی تیاریاں چل رہی ہیں۔ کچھ دیر بعد اطلاع ملی کہ انہیں زخمی حالت میں ایل این جے پی اسپتال لے جایا گیا ہے۔ سیما نے بتایا کہ اس کے شوہر نے بتایا کہ بھیڑ میں سے کچھ لوگوں نے ان پر پتھروں، گملوں، چپلوں اور جوتوں سے حملہ کیا۔ رات 11 بجے جب وہ گھر واپس آئے تو اس کا ہیلمٹ ٹوٹا ہوا تھا۔ انہوں نے کہا،”اگر ہیلمٹ کے بعد ایک اور پتھر ان کے سر پر لگا ہوتا تو وہ جان سے ہاتھ دھو سکتے تھے۔ زخمی پولیس والوں پر بھی پارلیمنٹ میں بحث ہونی چاہیے۔“

دہلی یونیورسٹی کی ایک طالبہ کنجل نے بتایا کہ اس کے والد دہلی پولیس میں سب انسپکٹر ہیں اور انہوں نے 15 سال تک بھارتی بحریہ میں میرین کمانڈو کے طور پر خدمات انجام دیں۔ ان کا دعویٰ ہے کہ تشدد کے دوران، ایک ہجوم نے اس کے والد پر حملہ کیا، جس کے بعد انہیں آر ایم ایل اسپتال میں داخل کرایا گیا۔ انہوں نے کہا کہ جب انہوں نے سوشل میڈیا چیک کیا تو ان کے والد کو مجرم کے طور پر پیش کیا جا رہا تھا۔”اگر دوسرے فریق کو سپریم کورٹ جانے کا حق ہے تو ہمیں بھی انصاف مانگنے کا حق ہے، اسی لیے ہم سپریم کورٹ گئے۔“

زخمی اے سی پی کے بیٹے لکشیہ سنگھ بشٹ نے کہا کہ وہ اپنے والد کواسپتال میں سر پر ٹانکے لگے دیکھ کر حیران رہ گئے۔ ان کے مطابق ان کے والد نے وضاحت کی کہ تمام مظاہرین پرتشدد نہیں تھے لیکن کچھ شرپسندوں نے اچانک حملہ کر دیا۔ لکشیہ نے کہا، ”ہر جگہ پولیس کو مورد الزام ٹھہرایا جا رہا ہے۔ ہم صرف یہ چاہتے ہیں کہ ملک دونوں فریقوں کو سنے اور زخمی پولیس والوں کی تکالیف پر بات کرے۔“

ہندوستھان سماچار

ہندوستان سماچار / محمد شہزاد