جموں۔سرینگر قومی شاہراہ پر لینڈ سلائیڈنگ، بسلری نالہ کا بہاؤ جزوی طور پر متاثر

جموں، 31 جولائی (ہ س)۔ ضلع رام بن کے رامسو علاقے میں جمعہ کے روز تازہ لینڈ سلائیڈنگ کے باعث جموں۔سرینگر قومی شاہراہ کے کنارے واقع بسلری نالہ کا بہاؤ جزوی طور پر متاثر ہوا ہے۔ تاہم انتظامیہ نے صورتحال کو قابو میں قرار دیتے ہوئے کہا ہے کہ فی الحال کسی آبادی کو محفوظ مقام پر منتقل کرنے کی ضرورت نہیں پڑی۔

سب ڈویژنل مجسٹریٹ رامسو مظاہر حسین شاہ نے بتایا کہ گزشتہ سال بھی اسی مقام پر بڑے پیمانے پر لینڈ سلائیڈنگ ہوئی تھی، جس کے باعث بسلری نالہ بند ہو گیا تھا اور احتیاطاً قریبی رہائشیوں کو تقریباً 15 سے 20 روز تک سرکاری اسکول میں منتقل کیا گیا تھا، جہاں انہیں تمام بنیادی سہولیات فراہم کی گئی تھیں۔

انہوں نے کہا کہ موجودہ لینڈ سلائیڈنگ کے نتیجے میں نالے کے بہاؤ پر جزوی اثر پڑا ہے، تاہم صورتحال خطرناک نہیں ہے۔ انتظامیہ مسلسل نگرانی کر رہی ہے اور کسی بھی ہنگامی صورتحال سے نمٹنے کے لیے تمام متعلقہ محکمے مستعد ہیں۔

ہندوستھان سماچار

--------------

ہندوستان سماچار / محمد اصغر