علی گڑھ, 31 جولائی (ہ س)۔

علی گڑھ ریجن کی کمشنر سنگیتا سنگھ کی دوسری کتاب Fire in the Semal Tree کی رونمائی جمعہ کو ایک منفرد انداز میں اسی سیمل کے درخت کے نیچے انجام پائی، جس کے مسلسل مشاہدے نے اس کتاب کو جنم دیا۔ یہ سیمل کا درخت کمشنر کیمپ آفس کے احاطے میں واقع ہے۔ تقریب میں انتظامی افسران، ماحولیات سے وابستہ افراد اور معزز شہریوں نے شرکت کی۔

یہ کتاب صرف ایک درخت کی داستان نہیں بلکہ سیمل کے ذریعے زندگی، وقت، موسموں کی تبدیلی، فطرت اور انسان کے باہمی تعلق کو نہایت حساس اور دلنشیں انداز میں پیش کرتی ہے۔ محترمہ سنگیتا سنگھ نے کئی ماہ تک اس درخت کے بدلتے رنگ، اس پر آنے والے پرندوں، دیگر جانداروں اور موسموں کے اثرات کا باریک بینی سے مشاہدہ کیا، جنہیں سادہ اور مؤثر زبان میں کتابی شکل دی گئی۔

اس موقع پر سنگیتا سنگھ نے کہا کہ مصروف زندگی میں فطرت انسان کو رک کر سوچنے اور محسوس کرنے کا موقع فراہم کرتی ہے۔ ان کے مطابق ایسی کتابیں لوگوں کو اپنے اردگرد موجود قدرتی تبدیلیوں کو سمجھنے اور ماحولیات کے تئیں حساس بننے کی ترغیب دیتی ہیں۔ انہوں نے بتایا کہ اس کتاب کو لکھنے کا کوئی پہلے سے منصوبہ نہیں تھا، بلکہ سیمل کے درخت سے طویل وابستگی اور اس کے اردگرد ہونے والی قدرتی سرگرمیوں نے خود بخود خیالات کو الفاظ کی شکل دے دی۔

تقریب میں موجود ماحولیات سے محبت رکھنے والے افراد اور دیگر معززین نے کتاب کو سراہتے ہوئے کہا کہ یہ تصنیف قارئین کو فطرت کو ایک نئے زاویے سے دیکھنے کی ترغیب دے گی۔ مقررین نے کہا کہ انتظامی ذمہ داریوں کی مصروفیات کے باوجود فطرت سے اس قدر گہرا تعلق اور ادبی تخلیق ایک قابلِ تقلید مثال ہے۔

یہ محترمہ سنگیتا سنگھ کی دوسری کتاب ہے۔ اس سے قبل ان کی پہلی کتاب شائع ہو چکی ہے، جس میں علی گڑھ کے پرندوں، حیاتیاتی تنوع اور پرندوں کے تحفظ کو موضوع بنایا گیا ہے۔ پرندوں کے مشاہدے سے شروع ہونے والا ان کا تخلیقی سفر اب سیمل کے ایک درخت تک پہنچا ہے۔ دونوں کتابوں میں فطرت کو محض دیکھنے کی چیز نہیں بلکہ زندگی کو سمجھنے اور محسوس کرنے کا ایک وسیلہ قرار دیا گیا ہے۔تقریب کے اختتام پر منڈل کمشنر سنگیتا سنگھ نے تمام مہمانوں، افسران، ماحولیات کے شائقین اور حاضرین کا شکریہ ادا کیا۔

---------------

ہندوستان سماچار / سید کامران علی گڑھ