نئی دہلی، 30 جولائی (ہ س)۔ نوجوانوں کے امور اور کھیل -کود اور محنت و روزگار کے مرکزی وزیر ڈاکٹر منسکھ مانڈویا نے جمعرات کو آئی ایس ایس ایف ورلڈ کپ 2026 میں سونے کا تمغہ جیتنے والی ہندوستانی نشانے باز ایشا سنگھ اور نائب صوبیدار نیرو ڈھانڈا کو اعزاز سے نوازا۔ انہوں نے دونوں ایتھلیٹوں کو مستقبل کے لیے بین الاقوامی حکومت کے تمام ممکنہ تعاون کا یقین دلایا۔

ڈاکٹر مانڈویا نے کہا کہ حکومت کھلاڑیوں کو بہترین سہولیات فراہم کرنے کے لیے پوری طرح پابندعہد ہے۔ انہوں نے کہا، ”حکومت اس بات کو یقینی بنانے کے لیے ہر ممکن کوشش کر رہی ہے کہ آپ کو کسی بھی مقابلے میں کارکردگی کا مظاہرہ کرنے میں کسی قسم کی کمی کا سامنا نہ کرنا پڑے۔ شوٹنگ ہمارے لیے سب سے اہم کھیلوں میں سے ایک ہے اور ہمیں آنے والے بڑے مقابلوں بشمول 2028 لاس اینجلس اولمپکس اور 2030 کے دولت مشترکہ کھیلمیں اس کھیل سے تمغوں کی سب سے زیادہ توقعات ہیں۔ ہم چاہتے ہیں کہ آپ لاس اینجلس اولمپک میں ہندوستان کے لئے تمغے جیتیں۔“

انہوں نے کہا کہ ہندوستانی نشانے بازوں کی کامیابیاں ٹارگٹ اولمپک پوڈیم اسکیم، نیشنل سینٹرز آف ایکسی لینس، کھیلو انڈیا اور سائنسی تربیت جیسی اسکیموں کے ذریعے کھلاڑیوں کی ترقی میں طویل مدتی سرمایہ کاری کا نتیجہ ہیں۔ ایشا سنگھ ٹاپس کور گروپ کا حصہ ہیں، جبکہ نیرو ڈھانڈا ٹاپس ڈیولپمنٹ گروپ سے وابستہ ہیں۔ دونوں کھلاڑی کھیلو انڈیا کے کھلاڑی بھی رہ چکے ہیں اور اب 2026 کے ایشین گیمز کی تیاری کر رہے ہیں۔

ہریانہ کے جیندکی رہنے والی 26 سالہ نائب صوبیدار نیرو ڈھنڈا نے اٹلی کے لوناٹو میں آئی ایس ایس ایف ورلڈ کپ میں تاریخ رقم کی اور ورلڈ کپ میں ٹریپ ایونٹ میں گولڈ میڈل جیتنے والی پہلی ہندوستانی خاتون شوٹر بنیں۔ انہوں نے کوالیفکیشن میں 125 میں سے 121 پوائنٹس اسکور کرکے نیا قومی ریکارڈ قائم کیا اور فائنل میں فرانس کی سابق عالمی چیمپئن کیرول کورمینیئر کو شکست دے کر سونے کا تمغہ جیتا۔ نائب صوبیدار نیرو، ہندوستانی فوج کی ملٹری پولیس کور میں، مہو میں آرمی مارکس مین شپ یونٹ میں تربیت حاصل کرتی ہیں۔ اس سے قبل انہوں نے 2025 ایشین شوٹنگ چیمپئن شپ میں بھی گولڈ میڈل جیتا تھا۔

21 سالہ ایشا سنگھ نے چین کے شہر ہانگزو میں منعقدہ آئی ایس ایس ایف ورلڈ کپ میں خواتین کے 25 میٹر پسٹل کا سونے تمغہ جیت کر اس سال ایونٹ میں اپنا دوسرا ورلڈ کپ گولڈ میڈل حاصل کیا۔ دو بار ایشین گیمز کی چاندی کا تمغہ جیتنے والی ایشا نے فائنل میں میزبان چین کو شکست دی۔ پچھلے سال، دوحہ ورلڈ چیمپئن شپ میں خواتین کے 25 میٹر پستول مقابلے میں کانسے کا تمغہ جیت کر وہ عالمی چیمپئن شپ کا تمغہ جیتنے والی پہلی ہندوستانی خاتون بن گئیں۔ انہوں نے میونخ ورلڈ کپ میں 43 پوائنٹس کے عالمی ریکارڈ کے ساتھ 25 میٹر پسٹل سونے کا تمغہ بھی جیتا تھا۔

دونوں نشانے بازوں کی کامیابیوں کی تعریف کرتے ہوئے وزیر کھیل نے اعتماد ظاہر کیا کہ وہ آئندہ ایشیائی کھیلوں اور لاس اینجلس اولمپکس میں بھی ہندوستان کا نام روشن کریں گی۔

ہندوستھان سماچار

ہندوستان سماچار / محمد شہزاد