نئی دہلی، 27 جولائی (ہ س)۔

کانگریس پارٹی کے طلبہ ونگ نیشنل اسٹوڈنٹس یونین آف انڈیا (این ایس یو آئی) کے صدر ونود جاکھڑ نے سوالیہ پرچہ لیک تنازعہ کے حوالے سے کہا کہ طلبہ کے احتجاج کے بعد پولس کی طرف سے درج ایف آئی آر غلط ہیں، کیونکہ حکومت نے تحریری یقین دہانی کرائی تھی کہ کسی کے خلاف کوئی کارروائی نہیں کی جائے گی۔ انہوں نے کہا کہ طلباء پر ظلم کرنے والوں کے خلاف سخت کارروائی کی جائے۔ جاکھڑ نے پیر کو یہاں کانگریس ہیڈکوارٹر میں ایک پریس کانفرنس سے خطاب کرتے ہوئے کہا کہ ملک بھر میں 25 سے زیادہ طلباء خودکشی کر چکے ہیں، لیکن حکومتی نمائندے ان کے اہل خانہ تک نہیں پہنچ پائے ہیں۔ دہلی میں تعلیمی نظام میں اصلاحات کا مطالبہ کرنے والے طلبہ پر لاٹھی چارج کیا گیا اور پیلٹ گن کا استعمال کیا گیا، جب کہ بہار میں طلبہ پر اے کے 47 سے فائرنگ کی گئی۔ زخمی طالب علم اسپتال میں اپنی زندگی کی جنگ لڑ رہا ہے۔

این ایس یو آئی کے صدر نے کہا کہ حکومت نے تحریری یقین دہانی کرائی ہے کہ کسی کے خلاف پولیس کارروائی نہیں کی جائے گی، اس لیے مقدمہ درج کرنا غلط ہے۔ این ایس یو آئی نے طلباء کے ساتھ ظلم کرنے والوں کے خلاف سخت کارروائی کا مطالبہ کیا۔ غلطی کرنے والے این ٹی اے اہلکاروں کے خلاف کارروائی کیوں نہیں کی گئی اور این ٹی اے کے ڈائریکٹر جنرل کے خلاف کوئی کارروائی کیوں نہیں کی گئی؟ این ایس یو آئی نے پولیس ایف آئی آر سے متاثرہ افراد کے لیے ایک ہیلپ لائن نمبر بھی قائم کیا ہے۔

ہندوستھان سماچار

ہندوستان سماچار / عطاءاللہ