نئی دہلی،27جولائی(ہ س)۔ پارلیمنٹ کے مانسون اجلاس کے 8ویں دن پیر کو اپوزیشن کے زبردست ہنگامے کی وجہ سے لوک سبھا کی کارروائی منگل (کل) صبح 11 بجے تک ملتوی کر دی گئی۔

عوامی امتحانات (ترمیمی) بل پیر کو لوک سبھا میں پیش کیا گیا۔ مرکزی وزیر ڈاکٹر جتیندر سنگھ نے صبح 11 بجے پیپر لیک سے متعلق پبلک ایگزامینیشن (ترمیمی) بل ایوان میں پیش کیا تاہم اپوزیشن پارٹیوں کے زبردست ہنگامے نے بحث کو روک دیا۔ اپوزیشن نے طالب علم کے ساتھ پولیس کے مظالم پر بحث پر اصرار کیا۔

اس سے پہلے بڑے ہنگامے کے درمیان لوک سبھا کی کارروائی پہلے دوپہر 12 بجے، پھر دوپہر 2 بجے اور پھر شام 5 بجے تک ملتوی کردی گئی۔ اپوزیشن جماعتوں کے زبردست ہنگامہ آرائی کی وجہ سے دن کی کارروائی ختم ہونے پر پارلیمنٹ کو منگل کی صبح 11 بجے تک ملتوی کر دیا گیا ہے۔

ہنگامہ آرائی کے باعث لوک سبھا کی کارروائی دن میں تین بار ملتوی کی گئی۔ جب بھی ایوان شروع ہوتا، کانگریس اور سماج وادی پارٹی کے اراکین پارلیمنٹ بینرز اور پوسٹروں کے ساتھ ویل میں داخل ہوتے اور نعرے لگانے لگتے۔ لوک سبھا کے اسپیکر اوم برلا نے حکومت اور حزب اختلاف کے اراکین پارلیمنٹ کو بل پر بحث کرنے سے پہلے اتفاق رائے کرنے کا حکم دیا۔ اس کے بعد برلا نے کانگریس کے رکن پارلیمنٹ کے سی وینوگوپال اور سماج وادی پارٹی کے رکن پارلیمنٹ اکھلیش یادو سے ملاقات کی۔

اس دوران پارلیمانی امور کے وزیر کرن رجیجو نے لوک سبھا اسپیکر اوم برلا کو بتایا کہ یہ ان کی سمجھ سے بالاتر ہے کہ اپوزیشن عوامی امتحانات (غیر منصفانہ طریقوں کی روک تھام) (ترمیمی) بل 2026 پر بحث کو روکنے کے لیے نعرے کیوں لگا رہی ہے۔ رجیجو نے کہا کہ پورے ملک کے نوجوان اس بل پر نظر رکھے ہوئے ہیں۔

ہندوستھان سماچار

---------------

ہندوستان سماچار / عبدالسلام صدیقی