کوڈرما، 27 جولائی (ہ س)۔ ضلع میں الگ الگ سڑک حادثات میں تین لوگوں کی جان چلی گئی۔ پہلا واقعہ کوڈرماگھاٹی میں میگھاتری میںرانچی-پٹنہ مرکزی شاہراہ پر کوڈرما پولیس اسٹیشن کے علاقے میں پیش آیا۔ یہاں، گٹی سے لدا ایک ٹرک سڑک کے کنارے کھڑے دوسرے ٹرک سے ٹکرا گیا۔ٹکر اتنی شدیدتھی کہ ٹرک کا ڈرائیور اور ہیلپر موقع پر ہی جاں بحق ہو گئے۔

وہیں دوسرا واقعہ جھمری تالاب کے قریب پیش آیا جہاں موٹر سائیکل کی ٹکر سے شدید زخمی نوجوان دوران علاج زخموں کی تاب نہ لاتے ہوئے چل بسا۔

مقامی لوگوں کی طرف سے فراہم کردہ معلومات کے مطابق، میگھاتری حادثے میں جاں بحق ڈرائیور کی شناخت 43 سالہ سادھو یادو ولد لکھن یادو ساکن نوادہ (بہار) اور ہیلپر کی شناخت 24 سالہ چھوٹو کمار ( ولد کرو یادو) کے طور پر ہوئی ہے۔ دونوں کزن تھے۔

جائے حادثہ کے قریب ایک ہوٹل چلانے والے امردیپ گری نے بتایا کہ وہ اتوار کی رات گاہکوں کو کھانا پیش کر رہے تھے کہ گٹی سے لدا ایک تیز رفتار ٹرک آیا اور سڑک کے مخالف سمت پر کھڑے ٹرک سے ٹکرا گیا۔ ٹکر اتنی شدید تھی کہ ٹرک کا کیبن مکمل طور پر تباہ ہو گیا، ڈرائیور اور ہیلپر اندر پھنس گئے۔ دونوں موقع پر ہی دم توڑ گئے۔ ان کی لاشیں بری طرح مسخ ہو چکی تھیں۔ مقامی لوگوں کا شبہ ہے کہ حادثہ بریک فیل ہونے کی وجہ سے پیش آیا۔ واقعہ کی اطلاع ملتے ہی کوڈرما پولیس جائے وقوعہ پر پہنچی۔ مقامی لوگوں کی مدد سے اور کافی کوشش کے بعد، انہوں نے لاشوں کو کیبن سے نکالا اور ایمبولینس کے ذریعے کوڈرما کے صدر اسپتال پہنچایا۔

لاشوں کو پوسٹ مارٹم کے بعد لواحقین کے حوالے کر دیا گیا۔ اس کے علاوہ، کوڈرما تھانہ علاقے کے جھمری تالاب کے قریب، رنجیت کمار یادو 36، ولد چنتامن یادو جو جھمری کا ساکن تھا، موٹر سائیکل کی ٹکر سے شدید طور پر زخمی ہوگیا۔ مقامی لوگوں نے اسے علاج کے لیے صدر اسپتال پہنچایا۔ ابتدائی طبی امداد دینے کے بعد، ڈاکٹروں نے اسے بہتر نگہداشت کے لیے آر آئی ایم ایس، رانچی ریفر کر دیا۔ جہاں انہوں نے دوران علاج اسپتال میں دم توڑ دیا۔

ہندوستھان سماچار

---------------

ہندوستان سماچار / عبدالسلام صدیقی