ایس پی صدر نے مقدمہ درج کرنے کا مطالبہ کیا

غازی آباد، 27 جولائی (ہ س)۔

اتر پردیش کے ضلع غازی آباد میں رہنے والے ہندو شدت پسند رہنما ستیم پنڈت کا ایک قابل اعتراض بیان وائرل ہو نے کے بعد ہنگامہ شروع ہو گیا ہے ۔ انہوں نے اشتعال انگیزی کے ذریعہ مبینہ طور پرکانوڑ یاترا کے دوران ایک مسلم افسر کی جگہ ہندو افسر کی تقرری کا مطالبہ کیا۔ پولیس نے معاملے کی تحقیقات شروع کر دی ہے۔

ہندو تنظیم کے کارکن ستیم پنڈت کی دو ویڈیوز سوشل میڈیا پر سامنے آئی ہیں۔ ایک ویڈیو میں ستیم پنڈت نے کہا کہ کانوڑ یاترا کے دوران کسی مسلمان افسر کو تعینات نہیں کیا جانا چاہیے۔ پنڈت نے مبینہ طور پر وزیر اعلیٰ یوگی آدتیہ ناتھ سے مطالبہ کیا کہ نندگرام کے اسسٹنٹ پولیس کمشنر ضیاء الدین احمد کو ہٹا کر ان کی جگہ کسی ہندو افسر کو تعینات کیا جائے۔

ڈپٹی کمشنر آف پولیس (سٹی/ٹرانس ہنڈن) دھول جیسوال نے بتایا کہ پولیس نے ویڈیو کا نوٹس لیا ہے اور معاملے کی تحقیقات کر رہی ہے۔ تحقیقات کے نتائج کی بنیاد پر کارروائی کی جائے گی۔

مذکورہ ویڈیو کے بعد ستیم پنڈت کا ایک اور ویڈیو وائرل ہوا۔ اس میں، وہ جنتر منتر کے مظاہرے سے متعلق دو نوجوان مظاہرین سے سوال کرتے ہوئے، ان کے نام، پتے اور مذاہب کے بارے میں پوچھ رہے ہیں۔ ویڈیو میں ستیم کو دونوں مظاہرین کے ساتھ گالی گلوچ کرتے ہوئے دیکھا جا رہا ہے۔

دریں اثنا سماج وادی پارٹی (ایس پی) کے صدر اکھلیش یادو نے وائرل ویڈیو کو شیئر کرتے ہوئے ستیم پنڈت کی گرفتاری کا مطالبہ کیا۔ مہوا موئترا نے یہ بھی مطالبہ کیا کہ دہلی پولیس ستیم پنڈت کے وائرل ویڈیو کے حوالے سے ایف آئی آر درج کرے۔ اس نے کہا کہ وہ خود بھی رپورٹ درج کر سکتی ہے۔

مظاہرین کو ہراساں کرنے کے بارے میں، غازی آباد پولیس نے کہا کہ چونکہ یہ ویڈیو دہلی پولیس کے دائرہ اختیار میں آتا ہے، اس لیے غازی آباد پولیس اس کی تحقیقات نہیں کر رہی ہے۔ ستیم پنڈت سے رابطہ کرنے کی کوشش کی گئی لیکن بارہا کوشش کے باوجود ان سے رابطہ نہیں ہو سکا۔

ستیم پنڈت کو ہندو ویر سینا کا بانی کہا جاتا ہے۔ وہ غازی آباد میں کافی سرگرم بتایا جاتا ہے۔ وہ جیل بھی جا چکا ہے۔ اگست 2024 میں اسے مسلمانوں کے خلاف اشتعال انگیز تقاریر کرنے پر گرفتار کیا گیا تھا۔ غازی آباد پولیس نے پہلے بھی اس کے خلاف ایسے معاملات میں کارروائی کی ہے جن میں ویڈیوز وائرل ہوئی تھیں۔

ہندوستھان سماچار

ہندوستان سماچار / عطاءاللہ