نئی دہلی، 26 جولائی (ہ س)۔

جنوبی ضلع پولیس کی اینٹی آٹو تھیفٹ اسکواڈ (اے اے ٹی ایس) نے گاڑی چلانے والوں کو نشانہ بنانے والے بدنامِ زمانہ ’ٹھک ٹھک‘ گینگ کے ایک سرگرم رکن کو گرفتار کر لیا ہے۔ ملزم کے پاس سے چوری کی ایک ٹی وی ایس جوپیٹر اسکوٹی، ایک لینووو لیپ ٹاپ، سات ہزار روپے نقد، والٹ، ایپل ٹائپ سی چارجر، ون پلس ایئر بڈز سمیت دیگر چوری کا سامان برآمد کیا گیا ہے۔ پولیس کا دعویٰ ہے کہ اس گرفتاری سے دہلی اور گروگرام کے دو چوری کے معاملات کا انکشاف ہوا ہے۔

جنوبی ضلع کے ڈپٹی کمشنر آف پولیس اننت متل کے مطابق اے اے ٹی ایس کی ٹیم ڈیفنس کالونی علاقے میں درج ’ٹھک ٹھک‘ چوری کے ایک معاملے کی تحقیقات کر رہی تھی۔ اسی دوران 23 جولائی کو خفیہ اطلاع اور تکنیکی نگرانی کی بنیاد پر پولیس نے ملزم ونود (24) کو دبوچ لیا۔ وہ امبیڈکر نگر کا ساکن ہے۔

تلاشی کے دوران ملزم کے پاس سے چوری کی ٹی وی ایس جوپیٹر اسکوٹی، سلوررنگ کا لینووو لیپ ٹاپ، 7,000 روپے نقد، ہرے رنگ کا والٹ، ایپل 20 واٹ ٹائپ سی چارجر، ون پلس ایئر بڈز اور دیگر ذاتی سامان برآمد ہوا۔ تحقیقات میں برآمد شدہ سامان کا تعلق ڈیفنس کالونی تھانے میں درج چوری کے معاملے اور ہریانہ کے گروگرام میں واقع ڈی ایل ایف فیز 2 تھانے میں درج ایک اور معاملے سے پایا گیا۔

پولیس تحقیقات میں سامنے آیا کہ ملزم ’ٹھک ٹھک‘ گینگ کا سرگرم رکن ہے۔ اس گینگ کے بدمعاش سڑک کنارے کھڑی یا دھیمی رفتار سے چل رہی گاڑیوں کو نشانہ بناتے ہیں۔ وہ گاڑی کے شیشے یا باڈی پر ’ٹھک ٹھک‘ کر کے ڈرائیور کی توجہبھٹکاتے ہیں اور اسی دوران گاڑی میں رکھا لیپ ٹاپ، بیگ، نقد رقم یا دیگر قیمتی سامان لے کر فرار ہو جاتے ہیں۔ پوری واردات کچھ ہی سیکنڈوں میں انجام دے دی جاتی ہے۔ پولیس کے مطابق گرفتار ونود کوئی نیا مجرم نہیں ہے۔ اس کے خلاف دہلی کے مختلف تھانوں میں لوٹ، چوری، اسنیچنگ، غیر قانونی اسلحہ رکھنے اور ایکسائز ایکٹ کے کل 11 مجرمانہ مقدمات پہلے سے درج ہیں۔ اس کے باوجود وہ مسلسل چوری اور ٹھگی جیسی وارداتوں میں سرگرم تھا۔

ہندوستھان سماچار

---------------

ہندوستان سماچار / انظر حسن