نئی دہلی، 18 جولائی (ہ س)۔ سرکاری شعبے کے آئی ڈی بی آئی بینک نے مالی سال 27-2026 کی پہلی سہ ماہی (اپریل-جون) کے نتائج کا اعلان کر دیا ہے۔ بینک کو پہلی سہ ماہی میں 2,115 کروڑ روپے کا خالص منافع حاصل ہوا، جو سالانہ بنیاد پر 5 فیصد زیادہ ہے۔ بینک نے گزشتہ مالی سال 26-2025 کی اسی مدت میں 2,007 کروڑ روپے کا خالص منافع کمایا تھا۔

آئی ڈی بی آئی بینک نے ہفتہ کے روز اسٹاک ایکسچینج کو دی گئی اطلاع میں کہا کہ 30 جون کو ختم ہونے والی پہلی سہ ماہی میں اس کی کل آمدنی بڑھ کر 8,573 کروڑ روپے ہو گئی، جبکہ مالی سال 26-2025 کی اسی سہ ماہی میں یہ 8,458 کروڑ روپے تھی۔ اس دوران بینک کی سودی آمدنی بھی بڑھ کر 7,541 کروڑ روپے ہو گئی، جو گزشتہ مالی سال 26-2025 کی اپریل-جون سہ ماہی میں 7,021 کروڑ روپے تھی۔

بینک کے مطابق بنیادی خالص سودی آمدنی (این آئی آئی) موجودہ مالی سال کی پہلی سہ ماہی میں 10 فیصد بڑھ کر 3,486 کروڑ روپے ہو گئی، جو مالی سال 26-2025 کی اسی سہ ماہی میں 3,166 کروڑ روپے تھی۔ تاہم رواں مالی سال کی پہلی سہ ماہی میں بینک کا آپریٹنگ منافع گھٹ کر 2,168 کروڑ روپے رہ گیا، جبکہ مالی سال 26-2025 کی اسی مدت میں یہ 2,354 کروڑ روپے تھا۔

آئی ڈی بی آئی بینک نے کہا کہ اس عرصے کے دوران بینک کا خالص سودی مارجن (این آئی ایم) بھی کم ہو کر 3.61 فیصد رہ گیا، جو مالی سال 26-2025 کی اپریل-جون سہ ماہی میں 3.68 فیصد تھا۔ بینک نے بتایا کہ اثاثوں کے معیار کے محاذ پر اس کی کارکردگی میں بہتری آئی ہے۔ اپریل-جون سہ ماہی میں بینک کا مجموعی غیر فعال اثاثہ (جی این پی اے) تناسب کم ہو کر مجموعی قرضوں کا 2.3 فیصد رہ گیا، جو ایک سال قبل 2.93 فیصد تھا۔

اسی طرح پہلی سہ ماہی میں بینک کا خالص غیر فعال اثاثہ (این این پی اے) یعنی پھنسے ہوئے قرضوں کا تناسب بھی کم ہو کر 0.16 فیصد رہ گیا، جو گزشتہ مالی سال کی اسی مدت میں 0.21 فیصد تھا۔ آئی ڈی بی آئی بینک کی مجموعی جمع رقوم بھی 30 جون 2026 تک 10 فیصد بڑھ کر 3,25,757 کروڑ روپے ہو گئیں، جو 30 جون 2025 کو 2,96,782 کروڑ روپے تھیں۔ بینک کے خالص قرضے 30 جون 2026 تک 22 فیصد بڑھ کر 2,58,968 کروڑ روپے ہو گئے، جبکہ گزشتہ مالی سال کی اسی مدت میں یہ 2,11,907 کروڑ روپے تھے۔

ہندوستھان سماچار

---------------

ہندوستان سماچار / عبدالواحد