جموں, 11 جولائی (ہ س)۔ گورنمنٹ ڈگری کالج ڈوڈہ میں نئی تعلیمی پالیسی 2020 کے نفاذ کے موضوع پر منعقدہ دو روزہ قومی کانفرنس ہفتہ کے روز اختتام پذیر ہوگئی۔ کانفرنس کے دوسرے اور آخری روز علمی مباحث، تحقیقی پیشکشوں اور تعمیری تبادلۂ خیال کا سلسلہ جاری رہا، جس میں ملک کے مختلف حصوں سے تعلق رکھنے والے محققین، اساتذہ اور ماہرینِ تعلیم نے شرکت کی۔

کانفرنس کے دوران آن لائن اور بالمشافہ تین تکنیکی اجلاس منعقد ہوئے، جن میں پچیس سے زائد تحقیقی مقالات پیش کیے گئے۔ مقررین نے جموں و کشمیر میں نئی تعلیمی پالیسی کے نفاذ سے متعلق چیلنجوں، امکانات اور عملی اقدامات پر تفصیلی روشنی ڈالی۔

اختتامی اجلاس سے مرکزی وزیر ڈاکٹر جتیندر سنگھ نے ورچوئل طور خطاب کیا۔ انہوں نے اس علمی کاوش کو سراہتے ہوئے کہا کہ نئی تعلیمی پالیسی 2020 اعلیٰ تعلیم میں شمولیت، مساوات اور معیار کو فروغ دینے کی بھرپور صلاحیت رکھتی ہے۔ انہوں نے گورنمنٹ ڈگری کالج ڈوڈہ کے پرنسپل اور عملے کی کامیاب انتظامات پر بھی تعریف کی۔

اس موقع پر گورنمنٹ ڈگری کالج بجبہاڑہ کے پرنسپل پروفیسر دیویندر کمار مہمانِ خصوصی کی حیثیت سے شریک ہوئے، جبکہ اندرا گاندھی نیشنل آزاد یونیورسٹی نئی دہلی کے ایسوسی ایٹ پروفیسر ڈاکٹر علی اصغر اور ڈپٹی سپرنٹنڈنٹ پولیس ڈوڈہ عادل ریشو خصوصی مہمانان میں شامل تھے۔ اجلاس کی صدارت گورنمنٹ ڈگری کالج ڈوڈہ کے پرنسپل ڈاکٹر جاوید اقبال نے کی۔ انہوں نے کہا کہ ادارہ نئی تعلیمی پالیسی کے مقاصد کے مؤثر نفاذ کے لیے پوری سنجیدگی کے ساتھ کام کر رہا ہے۔

اختتامی نشست میں ڈاکٹر جمشید احمد کی نگرانی میں ایک فکر انگیز مذاکرہ بھی منعقد ہوا، جس میں ماہرین اور شرکاء نے تعلیم میں شمولیت، مساوات اور رسائی کے فروغ سے متعلق اپنے خیالات پیش کیے۔ بعد ازاں ممتاز مہمانوں اور مقالہ نگاروں کو ان کی خدمات کے اعتراف میں اسناد اور یادگاری تحائف پیش کیے گئے۔

ہندوستھان سماچار

---------------

ہندوستان سماچار / محمد اصغر