نئی دہلی 3 جون ( ہ س)۔ امریکہ کی جانب سے بھارت پر ایک بار پھر اضافی ٹیرف عائد کیے جانے کے خدشات اور مشرقِ وسطیٰ میں دوبارہ کشیدگی بڑھنے کے امکانات کے باعث آج گھریلو شیئر بازار شدید دباؤ کا شکار رہا۔ سینسیکس اور نفٹی پورے دن منفی زون میں تجارت کرتے رہے۔ کاروبار کے اختتام پر سینسیکس 0.41 فیصد اور نفٹی 0.33 فیصد کی کمی کے ساتھ بند ہوئے۔

آج بازار میں آنے والی گراوٹ کے نتیجے میں سرمایہ کاروں کی دولت میں ایک لاکھ کروڑ روپے سے زائد کی کمی واقع ہوئی۔ بی ایس ای میں درج کمپنیوں کا مجموعی مارکیٹ کیپیٹلائزیشن آج کے کاروبار کے بعد گھٹ کر 460.98 لاکھ کروڑ روپے (عارضی) رہ گیا، جبکہ گزشتہ کاروباری دن یعنی منگل کو یہ 462.03 لاکھ کروڑ روپے تھا۔ اس طرح سرمایہ کاروں کو تقریباً 1.05 لاکھ کروڑ روپے کا نقصان برداشت کرنا پڑا۔

بی ایس ای کا سینسیکس آج 142.11 پوائنٹس کی کمی کے ساتھ 74,507.73 پوائنٹس پر کھلا۔ مسلسل فروخت کے دباؤ کے باعث دوپہر تقریباً 12 بجے یہ 1,157.24 پوائنٹس گر کر 73,492.60 پوائنٹس تک پہنچ گیا۔ بعد ازاں خریداروں کی جانب سے خریداری بڑھنے پر انڈیکس میں بہتری آئی، لیکن اختتامی مرحلے میں دوبارہ فروخت کا دباؤ بن گیا۔ نتیجتاً سینسیکس دن کے بلند ترین سطح سے 169.48 پوائنٹس نیچے آ کر 303.67 پوائنٹس کی مجموعی کمی کے ساتھ 74,346.17 پوائنٹس پر بند ہوا۔

اسی طرح این ایس ای کے نفٹی نے 67.60 پوائنٹس کی کمی کے ساتھ 23,415.95 پوائنٹس پر کاروبار کا آغاز کیا۔ مارکیٹ کھلتے ہی خریداری کے سہارے یہ ابتدائی منٹوں میں 23,447.65 پوائنٹس تک پہنچ گیا، لیکن بعد میں فروخت کا دباؤ بڑھنے سے مسلسل نیچے آتا گیا۔ نچلی سطحوں سے شاندار ریکوری کے باوجود آخری آدھے گھنٹے میں دوبارہ فروخت کا رجحان غالب آ گیا، جس کے باعث نفٹی 77.95 پوائنٹس کی کمی کے ساتھ 23,405.60 پوائنٹس پر بند ہوا۔

دن بھر کی خرید و فروخت کے بعد بڑے شیئرز میں اپولو ہاسپٹلز 2.48 فیصد، ٹی ایم پی وی 2.04 فیصد، میکس ہیلتھ کیئر 1.78 فیصد، اسٹیٹ بینک آف انڈیا 1.44 فیصد اور آئی سی آئی سی آئی بینک 1.26 فیصد اضافے کے ساتھ سرفہرست پانچ فائدہ مند شیئرز میں شامل رہے۔

دوسری جانب ٹی سی ایس 8.39 فیصد، ٹیک مہندرا 6.31 فیصد، ایچ سی ایل ٹیکنالوجیز 5.19 فیصد، انفوسس 3.79 فیصد اور وپرو 2.74 فیصد کمی کے ساتھ آج کے سرفہرست پانچ خسارے والے شیئرز میں شامل رہے۔

ہندوستھان سماچار

---------------

ہندوستان سماچار / عبدالواحد