نئی دہلی، 14 جون (ہ س)۔ فرانس کے نیس شہرمیں بھارت انوویٹ تقریب سے خطاب کرتے ہوئے، وزیر اعظم نریندر مودی نے ہندوستان اور فرانس کے درمیان اسٹریٹجک شراکت داری کو مشترکہ نقطہ نظر، اختراعات اور اخلاصپر مبنی قرار دیا۔ انہوں نے کہا کہ یہ پلیٹ فارم ہندوستانی ہنر اور یورپی سرمائے کے درمیان ایک پل کا کام کرے گا اور ہندوستانی اختراعات کو عالمی سطح پر لانے میں کلیدی کردار ادا کرے گا۔

وزیر اعظم مودی نے فرانس کے صدر ایمانوئل میکرون کے ساتھ مشترکہ طور پر بھارت انوویٹ پروگرام کا افتتاح کیا۔ پروگرام سے قبل وزیراعظم نے اہم سرمایہ کاروں اور وینچر کیپیٹل کے نمائندوں سے بھی ملاقات کی۔

وزیراعظم نے کہا کہ دنیا بھر کے ممالک تجارتی اور اسٹریٹجک پارٹنرشپ میں داخل ہوتے ہیں لیکن کچھ تعلقات مشترکہ مفادات تک محدود نہیں ہوتے۔ انہوں نے ہندوستان اور فرانس کے تعلقات کو اس طرح کے تعلقات کی ایک مثال قرار دیا۔ انہوں نے کہا کہ یہ مشترکہ وژن اور باہمی اعتماد پر مبنی ہے۔ یہ رشتہ مشغولیت، یقین، اختراع، اخلاص، مشترکہ اقدار اور مشترکہ وژن پر مشتمل ہے۔ اسی بنیاد پر دونوں ممالک نے حالیہ برسوں میں کئی نئے اقدامات شروع کیے ہیں۔

انہوں نے کہا کہ ”بھارت انوویٹ“ اس سمت میں ایک اہم قدم ہے۔ یہ پلیٹ فارم ہندوستانی ٹیلنٹ اور یورپی سرمائے کے درمیان ایک پل کا کام کر رہا ہے۔ یہ ہندوستانی نوجوانوں کو یورپی مہارت سے جڑنے اور اپنے خیالات کو آگے بڑھانے کا موقع فراہم کر رہا ہے۔

وزیر اعظم نے کہا کہ 21ویں صدی کا ہندوستان ایک بڑی تبدیلی سے گزر رہا ہے اور ملک ایک اسٹارٹ اپ انقلاب کا مشاہدہ کر رہا ہے۔ انہوں نے کہا کہ ہندوستان کے نوجوان ایک نئے زاویے سے انسانیت کے مسائل کا حل تلاش کر رہے ہیں۔ بھارت انوویٹ اس طرح کے عالمی معیار کے حل کو عالمی سطح پر لانے کا ایک ذریعہ ہے۔

انہوں نے کہا کہ آج ہندوستان صرف حل کا صارف نہیں ہے بلکہ فراہم کنندہ کے طور پر ابھر رہا ہے۔ ملک ٹیکنالوجی فراہم کرنے والے کے طور پر آگے بڑھ رہا ہے۔ انہوں نے موجود نوجوان کاروباریوں کی تعریف کرتے ہوئے کہا کہ وہ اعتماد اور توانائی سے بھرے ایک نئے ہندوستان کی عکاسی کرتے ہیں۔ کچھ کاروباری لوگ مصنوعی ذہانت کے ذریعے دیہی ہندوستان کی زندگیوں کو بدل رہے ہیں، جب کہ دیگر کسانوں کی مدد کے لیے سیٹلائٹ ٹیکنالوجی کا استعمال کر رہے ہیں۔

وزیر اعظم نے کہا کہ ہندوستان کا مقصد ایسی ٹیکنالوجی تیار کرنا ہے جو انسانیت کی خدمت کرے۔ انہوں نے وضاحت کی کہ ہندوستان کا ڈیجیٹل انقلاب اور ڈیجیٹل عوامی بنیادی ڈھانچہ اسی وژن پر مبنی ہے۔ انہوں نے کہا کہ مصنوعی ذہانت کے لیے ہندوستان کا وژن اے آئی سب کے لیے کے اصول پر مبنی ہے جس کا مقصد ہر فرد کی فلاح اور خوشی کو فروغ دینا ہے۔

وزیر اعظم نے نوٹ کیا کہ یہ سال ہندوستان-فرانس اختراعی سال کا آغاز ہے۔ انہوں نے مزید کہا کہ بھارت انوویٹ فرانس کے ساتھ بھی شروع کیا جا رہا ہے اور اس کے لئے صدر ایمانوئل میکرون کا شکریہ ادا کیا۔

---------------

ہندوستان سماچار / عبدالسلام صدیقی