مرکزی وزیر جتن پرساد جبل پور میں رانی درگاوتی پرگتی پتھ یاترا میں شامل ہوئے

جبل پور، 14 جون (ہ س)۔

وزیر اعظم نریندر مودی کی قیادت میں خدمت، گڈ گورننس اور غریبوں کی فلاح و بہبود کے 12 سال مکمل ہونے کے موقع پر، مرکزی وزیر مملکت برائے تجارت و صنعت نیز الیکٹرانکس اور انفارمیشن ٹیکنالوجی جتن پرساد اتوار کے روز مدھیہ پردیش کے جبل پور پہنچے اور یہاں منعقدہ رانی درگاوتی پرگتی پتھ یاترا میں شامل ہوئے۔

اس موقع پر مرکزی وزیر پرساد نے کہا کہ انہیں جبل پور کے عوام کے درمیان حاضر ہونے کی سعادت حاصل ہوئی ہے اور یہ اعزاز وزیر اعظم مودی اور مرکزی وزیر داخلہ امت شاہ کی قیادت میں ملک کے عوام کی دعاوں اور آشیرواد کا نتیجہ ہے۔ اس موقع پر مدھیہ پردیش کے وزیر برائے تعمیراتِ عامہ راکیش سنگھ بھی موجود تھے۔

مرکزی وزیر پرساد نے کہا کہ وزیر اعظم مودی کی قیادت میں ملک نے ترقی، گڈ گورننس اور استحکام کی نئی جہتیں قائم کی ہیں۔ وزیر اعظم کی قیادت میں لگاتار تیسری بار حکومت بننے سے ملک کو ایک مضبوط اور دور اندیش قیادت ملی ہے۔ مرکزی حکومت ’وکست بھارت-2047‘ (ترقی یافتہ ہندوستان) کے تصور کو شرمندۂ تعبیر کرنے کی سمت میں مسلسل کام کر رہی ہے۔

مرکزی وزیر نے رانی درگاوتی پرگتی پتھ پروجیکٹ کی ستائش کرتے ہوئے کہا کہ تقریباً سات کلومیٹر طویل اس پل (فلاں اوور) نے جبل پور کی شہری ترقی کو ایک نئی پہچان دی ہے۔ انہوں نے کہا کہ عالمی معیار کا بنیادی ڈھانچہ اب ہندوستان میں حقیقت بن رہا ہے اور یہ وزیر اعظم مودی کی قیادت میں ہی ممکن ہوا ہے۔

انہوں نے کہا کہ اس وقت دنیا کے کئی ممالک میں بدامنی، عدم استحکام اور تصادم کی صورتِ حال ہے، وہیں ہندوستان وزیر اعظم مودی کی قیادت میں ایک مستحکم، مضبوط اور قابلِ اعتماد ملک کے طور پر ابھرا ہے۔ ملک عالمی چیلنجوں کا کامیابی سے سامنا کر رہا ہے اور مسلسل ترقی کی راہ پر گامزن ہے۔

پرساد نے کہا کہ مرکزی حکومت نوجوانوں کے روشن مستقبل کے لیے مؤثر پالیسیاں بنا رہی ہے۔ آنے والے برسوں میں ترقی یافتہ ہندوستان کی تعمیر کے لیے تعلیم، روزگار، ٹیکنالوجی اور بنیادی ڈھانچے کے شعبوں میں وسیع پیمانے پر کام کیے جا رہے ہیں، جس سے ملک کے نوجوانوں کو نئے مواقع حاصل ہوں گے۔

اس موقع پر رکنِ پارلیمنٹ آشیش دوبے، میئر جگت بہادر سنگھ ’’انو‘‘، ایم ایل اے ابھلاش پانڈے، میونسپل کارپوریشن کے صدر ریکونج وج، بی جے پی جبل پور کے انچارج آلوک سنجر، مہیلا مورچہ کی صوبائی صدر اشونی پرانجپے، جبل پور ڈیولپمنٹ اتھارٹی کے صدر سندیپ جین، جبل پور ڈیولپمنٹ اتھارٹی کے نائب صدر پرشانت کیشروانی، صوبائی بی جے پی کے خزانچی اکھلیش جین، بی جے پی کے ضلعی صدر رتنیش سونکر، مہیلا مورچہ کی ضلعی صدر آتمیکا سنگھ سمیت دیگر عوامی نمائندے موجود تھے۔

ہندوستھان سماچار

---------------

ہندوستان سماچار / انظر حسن