بیڑ میونسپلٹی کے بیڑے میں جلد شامل ہوں گی فائر بریگیڈ کی جدید گاڑیاں

بیڑ، 11 جون (ہ س)۔ شہر میں آتشزدگی کے بڑھتے ہوئے واقعات کے پیش نظر میونسپلٹی کے فائر بریگیڈ محکمہ کو مزید مؤثر اور مضبوط بنانے کے لیے بیڑ اسمبلی حلقے کے بھارتیہ جنتا پارٹی رہنما ڈاکٹر یوگیش کھیرساگر کے مطالبے پر ضلع کی نگراں وزیر سنیترا پوار نے دو نئی فائر بریگیڈ کی جدید گاڑیوں کی منظوری دی ہے۔ ممبئی میں منعقدہ ایک اجلاس کے دوران انہوں نے اس فیصلے کی معلومات فراہم کیں۔

گزشتہ چند ماہ کے دوران بیڑ شہر میں آگ لگنے کے متعدد واقعات پیش آئے تھے۔ میونسپلٹی کے پاس مناسب ساز و سامان اور مطلوبہ وسائل کی کمی کے باعث شہریوں کو بڑے پیمانے پر مالی نقصان کا سامنا کرنا پڑا تھا۔ اس صورتحال کی جانب ڈاکٹر یوگیش کھیرساگر نے نگراں وزیر سنیترا پوار کی توجہ مبذول کراتے ہوئے ضلع سالانہ منصوبے کے تحت فنڈ فراہم کرنے کا مطالبہ کیا تھا۔

اس مطالبے پر مثبت ردعمل ظاہر کرتے ہوئے سنیترا پوار نے فوری طور پر متعلقہ حکام کو ٹیلی فون کے ذریعے ہدایات جاری کیں کہ ضلع سالانہ منصوبے سے ایک مکمل طور پر جدید اور سازوسامان سے لیس فائر فائٹنگ گاڑی کی منظوری دی جائے۔ اس کے ساتھ ہی حکومت کی ایک اسکیم کے تحت پہلے سے منظور شدہ لیکن زیر التوا دوسری فائر فائٹنگ گاڑی بھی جلد از جلد فراہم کرنے کی ہدایت دی گئی۔

اس فیصلے کے بعد توقع کی جا رہی ہے کہ جلد ہی دو نئی جدید فائر فائٹنگ گاڑیاں بیڑ میونسپلٹی کے بیڑے میں شامل ہو جائیں گی، جس سے ہنگامی حالات سے نمٹنے کی صلاحیت میں نمایاں اضافہ ہوگا اور شہریوں کے جان و مال کے تحفظ کو مزید مؤثر بنایا جا سکے گا۔

ہندوستھان سماچار

--------------------

ہندوستان سماچار / جاوید این اے