نئی دہلی، 3 مئی(ہ س )۔

عام آدمی پارٹی نے شاہدرہ ضلع کے ویوک وہار میں واقع ایک کثیر منزلہ رہائشی عمارت میں لگی خوفناک آگ کے نتیجے میں 9 افراد کی موت اور متعدد افراد کے شدید زخمی ہونے کے واقعے کو انتہائی افسوسناک اور دل دہلا دینے والا قرار دیا ہے۔ اس المناک واقعے کی اطلاع ملتے ہی آپ کے سینئر رہنما اور رکن اسمبلی سنجیو جھا اور کلدیپ کمار کی قیادت میں ایک نمائندہ وفد نے اسپتال جا کر زیر علاج زخمیوں سے ملاقات کی۔ اس کے بعد جائے وقوعہ کا دورہ کر کے مقامی لوگوں سے حادثے کی تفصیلات حاصل کیں۔ پارٹی نے اس واقعے کا ڈیڑھ ماہ قبل پالَم میں پیش آنے والے آتشزدگی کے واقعے سے موازنہ کرتے ہوئے ریکھا گپتا حکومت کو کم از کم اب سبق لے کر ٹھوس اقدامات کرنے کا مشورہ دیا ہے۔ آپ کے دہلی پردیش صدر سوربھ بھاردواج نے ویوک وہار کے اس دردناک آتشزدگی میں جاں بحق ہونے والے 9 افراد کے لیے پارٹی کی جانب سے گہری تعزیت کا اظہار کرتے ہوئے بی جے پی کی ریکھا گپتا حکومت کو سخت تنقید کا نشانہ بنایا۔ انہوں نے کہا کہ دہلی کے ویوک وہار میں ایک اور بھیانک آگ کے واقعے میں 9 افراد جل کر ہلاک ہو گئے، جبکہ وزیر اعلیٰ ریکھا گپتا مختلف ایڈیٹنگ والی ویڈیوز بنانے میں مصروف ہیں۔ ایسا لگتا ہے کہ انہوں نے دہلی میں پہلے پیش آنے والے آتشزدگی کے واقعات سے کوئی سبق نہیں سیکھا ہے، جو کہ انتہائی شرمناک ہے۔ حکومت کی غیر حساسیت اس کے طرزِ حکمرانی کے ہر پہلو میں صاف نظر آتی ہے۔سنجیو جھا نے کہا کہ ویوک وہار کا یہ آتشزدگی کا واقعہ نہایت دل خراش ہے، جس میں 9 افراد کی جان گئی ہے اور زخمیوں کا علاج جاری ہے۔ جاں بحق ہونے والوں میں سے سات افراد ایک ہی خاندان کے تھے۔ یہ واقعہ پالَم میں پیش آنے والے حادثے سے کافی مشابہت رکھتا ہے۔ متاثرہ خاندان اس وقت بات کرنے کی حالت میں نہیں ہے۔ ہم خدا سے دعا کرتے ہیں کہ وہ متاثرہ خاندان کو اس بڑے صدمے سے جلد نکلنے کی طاقت عطا کرے۔انہوں نے کہا کہ اس آتشزدگی کی اصل وجہ ابھی تک معلوم نہیں ہو سکی ہے۔ کچھ لوگوں کا کہنا ہے کہ فائر بریگیڈ وقت پر نہیں پہنچی، جبکہ بعض کے مطابق وہ بروقت پہنچ گئی تھی۔ کچھ افراد کا کہنا ہے کہ فائر بریگیڈ کی گاڑیاں موقع تک پہنچ ہی نہیں پا رہی تھیں۔ اگر ایسا ہے تو اب وقت آ گیا ہے کہ فائر بریگیڈ کو جدید ترین آلات سے لیس کیا جائے۔ اسے جدید انداز میں مستحکم بنایا جائے تاکہ کثیر منزلہ عمارتوں میں پیش آنے والے ایسے حادثات میں پھنسے لوگوں کو بچایا جا سکے۔ وہاں مناسب حفاظتی جال، الیکٹرک سیڑھیاں اور تیز رفتار پانی پھینکنے والے پائپوں کا انتظام ہونا چاہیے۔سنجیو جھا نے کہا کہ فائر بریگیڈ کو ابھی بھی کئی چیلنجز کا سامنا ہے۔ عملے کے پاس مناسب آگ سے بچا¶ کے سوٹ اور جوتے تک نہیں ہیں، تو وہ اتنی بڑی آفت پر کیسے قابو پا سکتے ہیں؟ ریکھا گپتا حکومت کو بڑی بڑی باتوں کے بجائے ان واقعات سے سبق لے کر ایسے اقدامات کرنے چاہئیں جن سے مستقبل میں ایسے حادثات کو روکا جا سکے۔انہوں نے الیکٹرانک تالوں کی ٹیکنالوجی پر بھی بات کرتے ہوئے کہا کہ اب چیزوں کو جدید بنانا ضروری ہو گیا ہے۔

ہندوستھان سماچار

ہندوستان سماچار / Md Owais Owais