بھوپال، یکم مئی (ہ س)۔ مدھیہ پردیش کے وزیر اعلیٰ ڈاکٹر موہن یادو نے جبل پور کے برگی ڈیم حادثے کی جانچ کی ہدایت دینے کے ساتھ ہی حادثے میں لوگوں کو بچانے والوں کو اعزاز سے نوازنے کی بات کہی ہے۔ انہوں نے کہا کہ موسمی گرداب کے باعث یہ افسوسناک واقعہ پیش آیا۔

وزیر اعلیٰ ڈاکٹر یادو نے کہا کہ اس کی اطلاع ملتے ہی وزیر تعمیراتِ عامہ راکیش سنگھ، وزیر مملکت برائے ثقافت و سیاحت دھرمیندر سنگھ لودھی، پرنسپل سکریٹری سنجے دوبے، اے ڈی جی، این ڈی آر ایف، ایس ڈی آر ایف سمیت مقامی انتظامیہ کے افسران راحت اور بچاو کے کام میں پوری مستعدی کے ساتھ مصروف ہو گئے۔ ہماری راحت اور بچاو ٹیم نے تقریباً 29 لوگوں کو محفوظ باہر نکالا ہے، ریسکیو جاری ہے، اب تک 9 لاشیں برگی ڈیم سے باہر نکالی گئی ہیں۔

وزیر اعلیٰ ڈاکٹر یادو نے جمعہ کو میڈیا نمائندوں سے لوک بھون کے باہر بات چیت میں یہ معلومات دی۔ انہوں نے کہا کہ کروز حادثہ انتہائی افسوسناک ہے، ریاستی حکومت نے حادثے کی جانچ کی ہدایت دی ہے۔ ایسی حادثے سے دل دکھی ہے۔ تمام شہریوں کو بوٹنگ کے دوران لائف سیونگ جیکٹ ضرور پہننی چاہیے، جنہوں نے لائف جیکٹ کا استعمال کیا، وہ محفوظ رہے۔ مستقبل میں اس طرح کے حادثات نہ ہوں، اس کے لیے محکمہ سیاحت سے جانچ کرائی جائے گی۔

انہوں نے کہا کہ حادثے میں جان گنوانے والوں کے لواحقین کے تئیں ہماری پوری ہمدردیاں ہیں۔ انہوں نے کہا کہ ریسکیو ٹیم نے بہادری کے ساتھ اپنی جان کی پرواہ کیے بغیر کئی لوگوں کو محفوظ بچایا ہے۔ جن افراد نے مستعدی کے ساتھ راحت اور بچاو کے کام میں حصہ لیا، ان تمام بہادر شہریوں کو یومِ آزادی 15 اگست پر اعزاز سے نوازا جائے گا۔

قابلِ ذکر ہے کہ جمعرات کی شام کو اچانک موسم خراب ہوگیا اور تیز آندھی- طوفان شروع ہو گیا۔ اسی دوران جبل پور کے برگی ڈیم میں سیاحوں سے بھرا ایک کروز کھمریا ٹاپو کے پاس توازن بگڑنے سے ڈوب گیا۔ واقعے میں جمعہ کی صبح تک 9 لاشیں ملی ہیں، جبکہ 29 لوگوں کو محفوظ نکال لیا گیا ہے۔ انتظامیہ کے مطابق 09 سے زیادہ لوگ ابھی بھی لاپتہ ہیں، جن کی تلاش جاری ہے۔

ہندوستھان سماچار

---------------

ہندوستان سماچار / انظر حسن