جموں, 29 اپریل (ہ س)۔ ضلع ڈوڈہ میں پولیس نے عوامی امن و امان کو برقرار رکھنے کے لیے دو عادی مجرموں کو پبلک سیفٹی ایکٹ (پی ایس اے) کے تحت حراست میں لے لیا ہے۔ دونوں کو بعد ازاں ضلع جیل ادھم پور منتقل کر دیا گیا۔پولیس کے مطابق پہلا ملزم محمد رفیق ولد محمد صابر سکنہ سیکواں بیولی، تحصیل و ضلع ڈوڈہ ہے، جو چوری اور چھینا جھپٹی کے متعدد مقدمات میں ملوث رہا ہے۔ اس کے خلاف پولیس اسٹیشن ڈوڈہ میں کئی ایف آئی آرز درج ہیں، جن میں 2022، 2023، 2024 اور 2025 کے کیس شامل ہیں۔ حکام کا کہنا ہے کہ سابقہ کارروائی کے باوجود وہ مسلسل غیر قانونی سرگرمیوں میں ملوث رہا اور عوامی امن کے لیے خطرہ بنا ہوا تھا۔دوسرا ملزم دین محمد ولد منور وانی سکنہ دھار دشنان ہے، وہ بھی مختلف مجرمانہ مقدمات میں ملوث پایا گیا، جن میں 2025 اور 2026 کے کیس شامل ہیں۔پولیس نے بتایا کہ دونوں افراد کے خلاف ڈوزیئر تیار کر کے مجاز اتھارٹی کو پیش کیا گیا، جس کے بعد پی ایس اے کے تحت حراستی احکامات جاری کیے گئے۔ بعد ازاں پولیس ٹیم نے دونوں کو گرفتار کر کے ضلع جیل ادھم پور منتقل کر دیا تاکہ انہیں مزید غیر قانونی سرگرمیوں سے روکا جا سکے۔
ڈوڈہ پولیس نے کہا ہے کہ قانون کی عملداری کو یقینی بنانے اور عوام کے جان و مال کے تحفظ کے لیے اس طرح کی کارروائیاں جاری رہیں گی، جبکہ عوام سے اپیل کی گئی ہے کہ وہ پولیس کے ساتھ تعاون کریں اور کسی بھی مشکوک سرگرمی کی اطلاع دیں۔
ہندوستھان سماچار
---------------
ہندوستان سماچار / محمد اصغر
