علی گڑھ, 29 اپریل (ہ س)۔

جے این میڈیکل کالج، علی گڑھ مسلم یونیورسٹی (اے ایم یو) کے شعبہ اناٹومی کے زیر اہتمام ”مزاحمتی صلاحیت کی نشو و نما: دشوار گزار حالات میں تناؤ کا بندوبست“ کے عنوان پر ایک معلوماتی اور انٹرایکٹیو سیشن منعقد کیا گیا۔سیشن کی نظامت ڈاکٹر آصف حسن (اسسٹنٹ پروفیسر) اور ڈاکٹر ایشا رحمان، گیسٹ فیکلٹی ممبر، شعبہ نفسیات نے کی۔ دونوں ماہرین نے نہایت مؤثر اور بصیرت افروز انداز میں گفتگو کرتے ہوئے مشکل حالات میں ذہنی دباؤ سے نمٹنے اور لچک پیدا کرنے کی حکمت عملیاں پیش کیں۔ فیکلٹی آف میڈیسن کے ڈین پروفیسر محمد خالد نے بھی پروگرام میں شرکت کی اور طلبہ کی حوصلہ افزائی کی۔

پروگرام کے کنوینر اور شعبہ کے چیئرمین پروفیسر فضل الرحمن نے اس موقع پر کہا کہ طبی تعلیم اور صحت کی دیکھ بھال کے دباؤ والے ماحول میں تناؤ اکثر ایک مستقل ساتھی کی طرح رہتا ہے، لیکن اصل پہچان اس بات سے ہوتی ہے کہ افراد کس طرح عزم، مطابقت اور حوصلے کے ساتھ اس کا سامنا کرتے ہیں۔ پروگرام میں شعبہ کے سینئر اساتذہ موجود تھے۔سیشن کی نظامت شعبہ اناٹومی کے جونیئر ریزیڈنٹس ڈاکٹر پربین چودھری اور ڈاکٹر وشوانی نے کی۔ تنظیمی ٹیم کے دیگر اراکین میں ڈاکٹر نصرہ رحمان (اسسٹنٹ پروفیسر)، ڈاکٹر جاوید، ڈاکٹر دلشاد، ڈاکٹر عبداللہ، ڈاکٹر سویتا چودھری اور ڈاکٹر سدرہ خان (جے آر) شامل تھے۔آخر میں ڈاکٹر نیما عثمان، اسسٹنٹ پروفیسر، شعبہ اناٹومی اور پروگرام کوآرڈینیٹر نے شکریہ کے کلمات ادا کئے۔

---------------

ہندوستان سماچار / سید کامران علی گڑھ