چنڈی گڑھ ، 29 اپریل (ہ س)۔ پنجاب کے وزیر اعلی بھگونت مان نے بدھ کو کہا کہ وہ 5 مئی کو صدر جمہوریہ ہند دروپدی مرمو سے ملاقات کریں گے تاکہ عام آدمی پارٹی کے سات راجیہ سبھا ممبران پارلیمنٹ کے بھارتیہ جنتا پارٹی میں شامل ہونے کے معاملے پر بات چیت کی جا سکے۔ مان نے پہلے صدر سے ملاقات کا وقت مانگا تھا تاکہ وہ پارٹی ایم ایل ایز سے ملاقات کرکے ان ایم پیز کو واپس بلانے کا مطالبہ کرسکیں۔

میڈیا سے بات کرتے ہوئے مان نے کہا کہ صدر نے انہیں 5 مئی کو دوپہر 12 بجے کا وقت دیا ہے اور وہ ان سے ضرور ملاقات کریں گے۔ تاہم انہوں نے یہ واضح نہیں کیا کہ آیا اس وفد میں تمام ایم ایل ایز کو شامل کیا جائے گا۔ قابل ذکر ہے کہ 24 اپریل کو عام آدمی پارٹی کو اس وقت بڑا جھٹکا لگا جب اس کے 10 میں سے 7 راجیہ سبھا ممبران پارلیمنٹ – راگھو چڈھا ، اشوک متل ، سندیپ پاٹھک ، ہربھجن سنگھ ، راجندر گپتا ، وکرم جیت ساہنی، اور سواتی مالیوال نے پارٹی چھوڑ کر بی جے پی کا ساتھ دیا۔

دریں اثناءوزیراعلیٰ نے دھان کی کاشت اور پانی کے انتظام سے متعلق اہم معلومات بھی شیئر کیں۔انہوں نے کہا کہ اپ گریڈ شدہ نہروں میں پانی یکم مئی سے چھوڑا جائے گا۔ بدھ کو 21,000 کیوسک پانی چھوڑا گیا جو یکم مئی تک کسانوں تک پہنچ جائے گا۔ انہوں نے کہا کہ یہ فراہمی باغبانی کے لیے بھی فائدہ مند ثابت ہوگی۔مان نے کہا کہ ریاستی حکومت ٹیوب ویلوں پر انحصار کم کرنے کے لیے نہری پانی کے استعمال کو فروغ دے رہی ہے۔ مارچ 2026 تک، نہروں اور پائپ لائنوں پر 6,700 کروڑ روپے خرچ ہو چکے ہیں۔

اس کے علاوہ زیر زمین پانی کی سطح کو بڑھانے کے لیے ریچارج پوائنٹس بنائے گئے ہیں جس کی وجہ سے پانی کی سطح میں 2 سے 4 میٹر تک اضافہ ہوا ہے اور تقریباً 21 لاکھ کیوبک میٹر پانی زمین میں ری چارج ہو چکا ہے۔حکومت نے دھان کی بوائی کا نیا شیڈول بھی تیار کر لیا ہے۔ اس بار بوائی یکم جون سے شروع ہوگی اور پنجاب کو چار زونز میں تقسیم کیا گیا ہے۔ براہ راست بوائی 15 مئی سے 31 مئی تک ہوگی ، جبکہ پیڈلنگ کا طریقہ استعمال کرنے والے کسانوں کو یکم جون سے پانی ملے گا۔ مختلف اضلاع کو مرحلہ وار پانی فراہم کیا جائے گا۔

ہندوستھان سماچار

ہندوستان سماچار / Mohammad Khan