نئی دہلی، 25 اپریل (ہ س)۔

دوارکا ضلع کے ڈابری تھانہ علاقہ میں بقایا رقم کا مطالبہ کرنے گئے ٹینٹ کاروباری پر جان لیوا حملے کا معاملہ سامنے آیا ہے۔ الزام ہے کہ متاثرہ کے دونوں ہاتھ کاٹنے کی کوشش کی گئی۔ زخمی شخص، جس کی حالت نازک تھی، پہلے مقامی اسپتال اور بعد میں ایمس ریفر کیا گیا۔ پولیس نے مرکزی ملزم کو گرفتار کر لیا ہے، جب کہ دو نوجوانوں کو حراست میں لے لیا گیا ہے۔

دوارکا ضلع کے ڈپٹی کمشنر آف پولیس کشل پال سنگھ نے ہفتہ کو بتایا کہ 24 اپریل کی رات تقریباً 8:30 بجے پی سی آر کال موصول ہوئی کہ وجے انکلیو علاقے میں کچھ لوگوں نے گرائنڈر سے ایک شخص کے ہاتھ کاٹ دیے۔ پولیس جائے وقوعہ پر پہنچی اور زخمی شخص کی شناخت 32 سالہ لوکیش گپتا کے طور پر کی ہے جو وجے انکلیو کا رہنے والا ہے جو حلوائی اور ٹینٹ سروس فراہم کرنے کا کام کرتا ہے۔ تفتیش سے پتہ چلا کہ ملزم اجے پال نے لوکیش کو 20 اپریل کو اپنی بیٹی کی شادی کے لیے ٹینٹ اور کیٹرنگ سروسز کے لیے رکھا تھا۔ یہ سودا کل 2.5 لاکھ روپے کا تھا، جس میں سے تقریباً 2 لاکھ روپے ابھی باقی تھے۔ الزام ہے کہ جب لوکیش بقایا رقم لینے اجے پال کے گھر پہنچا تو ملزم نے اپنے دو تین ساتھیوں کے ساتھ مل کر اس پر حملہ کردیا۔

پولیس کے مطابق ملزم نے لوکیش کو پکڑ کر گرائنڈر سے اس کے دونوں ہاتھ کاٹنے کی کوشش کی جس سے وہ شدید زخمی ہوگیا۔ زخمی شخص کو ابتدائی طور پر راشی میڈیکل سینٹر لے جایا گیا، جہاں سے اس کی حالت بگڑنے پر اسے ایمس ریفر کر دیا گیا۔

پولیس نے جائے وقوعہ سے شواہد اکٹھے کر کے متاثرہ کا بیان ریکارڈ کر لیا۔ طبی معائنے میں اس بات کی تصدیق ہوئی کہ متاثرہ کو تیز دھار ہتھیار سے شدید چوٹیں آئی ہیں۔ اس کے بعد، متعلقہ دفعات کے تحت ڈابری پولیس اسٹیشن میں مقدمہ درج کیا گیا اور مرکزی ملزم اجے پال (53) کو گرفتار کر لیا گیا۔

ہندوستھان سماچار

ہندوستان سماچار / عطاءاللہ