پٹنہ، 22 اپریل (ہ س)۔

نوجوان کاروباری اور سماجی کارکن، انجینئرڈاکٹرپلکت گرگ نے اپنے حامیوں کے ساتھ ریاستی کانگریس دفترصداقت آشرم میں ریاستی کانگریس صدر راجیش رام سے کانگریس پارٹی کی رکنیت قبول کی۔اس موقع پر کانگریس خاندان میں شامل ہونے والے تمام لوگوں کا خیرمقدم کرتے ہوئے ریاستی کانگریس صدر نے کہا کہ ڈاکٹر پلکت گرگ جیسے توانا اور سماجی طورپرسرگرم نوجوانوں کے پارٹی میں شامل ہونے سے کانگریس کو نئی طاقت اور سمت ملے گی۔ ڈاکٹر پلکت گرگ کے ساتھ آج کانگریس پارٹی میں شامل ہونے والے نمایاں افراد میں نوجوان کاروباری انجینئراسرائیل انصاری، انجینئر راجیش کمار، انجینئر پون سنہا، آر جے ڈی لیڈر راج کمار پرساد کے علاوہ کئی سماجی کارکنان اور نوجوان شامل تھے۔

ریاستی کانگریس صدر نے کہا کہ آج قومی اور ریاستی سیاست میں نوجوانوں کی شرکت بہت ضروری ہے۔ کانگریس پارٹی ہمیشہ سے ایک ایسی پارٹی رہی ہے جو نوجوانوں، کاروباری افراد اور سماج کے تمام طبقات کو اپناتی ہے۔ انہوں نے کہا کہ ڈاکٹر پلکت گرگ اور ان کے ساتھیوں کا کانگریس خاندان میں داخلہ نچلی سطح پر تنظیم کو مزید مضبوط کرے گا۔ انہوں نے کہا کہ کانگریس کا نظریہ سماجی انصاف، جامع ترقی اور جمہوری اقدار پر مبنی ہے۔ نوجوانوں اور سماجی کارکنوں کی بڑی تعداد میں پارٹی میں شامل ہونا اس بات کی نشاندہی کرتا ہے کہ لوگ کانگریس کی پالیسیوں اور قیادت پر اعتماد کر رہے ہیں۔

اس موقع پر پارٹی میں شامل ہونے والے پلکت گرگ نے کہا کہ ملک اب بیان بازی سے تھک چکا ہے۔ ہمارے اسلاف کی قربانیوں کو آج داغدار کیا جا رہا ہے۔ اس لیے آزادی اور آئین کے تحفظ کے لیے آگے آنا ضروری ہے۔ اس اجتماع میں میڈیا چیئرمین راجیش راٹھوڑ، سینئر لیڈر اسیت ناتھ تیواری، چندر بھوشن راجپوت اور دیگر لیڈران موجود تھے۔

ہندوستھان سماچار

ہندوستان سماچار / Mohammad Afzal Hassan