بی جے پی کی خواتین ایم ایل اے نے رکن پارلیمنٹ پپو یادو کے بیان پر ملک بھر کی خواتین سے معافی مانگنے کا مطالبہ کیا

پٹنہ، 22 اپریل (ہ س)۔ بہار بی جے پی کی خواتین لیڈروں نے پورنیہ کے رکن پارلیمنٹ کے بیان پر برہمی کا اظہار کیا ہے۔ بدھ کے روزبی جے پی دفتر میں ایک پریس کانفرنس سے خطاب کرتے ہوئے بی جے پی ایم ایل اے شریشی سنگھ نے کہا کہ پپو یادو کو ہندوستان کی تمام خواتین سے معافی مانگنی چاہیے۔ انہوں نے کہا کہ پپو یادو کا بیان کورووں کی بری سوچ کو ظاہر کرتا ہے۔ اگر اپوزیشن لیڈروں کی بیٹیاں آگے بڑتھی ہیں تو ان کے لئے بھی یہی رویہ ہو سکتا ہے۔

کانفرنس میں ایم ایل اے میتھلی ٹھاکر نے کہا کہ میں نے کچھ دنوں پہلے ہی سیاست میں قدم رکھا ہے، لیکن میں آپ کو بتا سکتی ہوں کہ پپو یادو کی ذہنیت ٹھیک نہیں ہے۔ میں ان لوگوں کے بارے میں کیا کہوں جن کی سوچ اتنی بری ہے؟ پپو یادو کو سامنے آکر معافی مانگنی چاہیے۔ تیجسوی یادو، راہل گاندھی اور باقی سب معافی مانگیں۔ معافی مانگے بغیر، انہیں بخشا نہیں جائے گا۔

بی جے پی ایم ایل اے سنگیتا کماری نے کہا کہ ویسے لوگ جو خود سیاست میں ہیں، ان کے خاندان کی خواتین بھی سیاست کر رہی ہیں۔ اس ملک میں خواتین کی عزت کی جاتی ہے۔ پپو یادو نے جو کہا اس کے بارے میں، میں راہل گاندھی سمیت اپوزیشن لیڈروں سے کہنا چاہتی ہوں کہ وہ معافی مانگیں۔ انہیں عوامی طور پر معافی مانگنی چاہیے ورنہ خواتین اپنی عزت کی حفاظت کرنا جانتی ہیں۔

ایم ایل اے انامیکا پٹیل نے کہا کہ پورا ملک جانتا ہے کہ ہم خواتین کس نسب سے آتی ہیں۔ انہوں نے کہا کہ پپو یادو کے بیان سے ان کی بیوی رنجیتا بھی شرمندہ ہوں گی۔ میں رنجیتا کو کچھ نہیں کہوں گی، لیکن ہم جانتے ہیں کہ کیسے سبق سکھانا ہے۔ پپو یادو انسانیت سے حیوانیت کی طرف بڑھ رہے ہیں۔ اگر وہ حد سے تجاوز کر تے ہیں تو سزا یقینی ہے۔

قابل ذکر ہے کہ پورنیہ کے رکن اسمبلی پپو یادو نے 20 اپریل کو خواتین کے ریزرویشن کو لے کر ایک متنازعہ بیان دیا تھا۔ پپو یادو نے کہا تھا کہ 90 فیصد خواتین کا سیاسی کریئر سیاستدانوں کے بیڈ سے شروع ہوتا ہے۔ پورنیہ کے رکن اسمبلی کے بیان سے تنازعہ کھڑا ہوگیا ہے۔ جہاں خواتین کمیشن نے ان کے بیان کو لے کر نوٹس جاری کیا ہے، وہیں اب بی جے پی خواتین لیڈروں نے ان پر حملہ کیا ہے۔

ہندوستھان سماچار

ہندوستان سماچار / Mohammad Afzal Hassan