نئی دہلی، 18 اپریل (ہ س)۔ انڈین پریمیئر لیگ (آئی پی ایل) 2026 میں سن رائزرز حیدرآباد نے زخمی ڈیوڈ پین کی جگہ جنوبی افریقہ کے تیز گیند باز جیرالڈ کوئٹزی کو ٹیم میں شامل کیا ہے۔ پین اس سیزن میں دو میچ کھیلنے کے بعد ٹخنوں کی چوٹ کی وجہ سے پورے ٹورنامنٹ سے باہر ہو گئے ہیں۔

25 سالہ جیرالڈ کوئٹزی اس سال کی نیلامی میں ان سولڈ رہے تھے، لیکن اب انہیں 2 کروڑ روپے میں سن رائزرز حیدرآباد نے اپنی ٹیم میں شامل کیا ہے۔ کوئٹزی اس سے قبل آئی پی ایل میں ممبئی انڈینز اور گجرات ٹائٹنز کے لیے کھیل چکے ہیں، جہاں انہوں نے 14 میچوں میں 15 وکٹیں حاصل کی ہیں۔

کوئٹزی حال ہی میں ٹی20 ورلڈ کپ میں جنوبی افریقہ کی ٹیم کا حصہ تھے، حالانکہ انہیں کوئی میچ کھیلنے کا موقع نہیں ملا۔ اس کے بعد انہوں نے نیوزی لینڈ کے خلاف پانچ ٹی20 بین الاقوامی میچوں کی سیریز میں حصہ لیا تھا۔

اس دوران، سن رائزرز حیدرآباد کو ایک اور بڑی تقویت کپتان پیٹ کمنز کے ٹیم کے ساتھ جڑنے سے ملی ہے۔ کمنز 17 اپریل کو ٹیم کے ساتھ جڑے اور 25 اپریل کو راجستھان رائلز کے خلاف مقابلے کے لیے دستیاب رہیں گے۔

فی الحال سن رائزرز حیدرآباد پوائنٹس ٹیبل میں پانچویں نمبر پر ہے اور آج (18 اپریل) چنئی سپر کنگز کے خلاف اپنا اگلا مقابلہ کھیلے گی۔

ہندوستھان سماچار

---------------

ہندوستان سماچار / انظر حسن