اے ایم یو میں عالمی یومِ ورثہ 2026 پر قومی سمینار منعقد

علی گڑھ، 18 اپریل (ہ س)۔ علی گڑھ مسلم یونیورسٹی کے شعبہ میوزیالوجی کی جانب سے عالمی یومِ ورثہ 2026 کے موقع پر ثقافتی اور قدرتی ورثے کے تحفظ کی اہمیت پر ایک قومی سمینار کا انعقاد کیا گیا۔ آرکیالوجیکل سروے آف انڈیا (اے ایس آئی)، آگرہ سرکل کی سپرنٹنڈنٹ ڈاکٹر سمیتا ایس کمار نے اپنے کلیدی خطاب میں تاج محل کے خصوصی حوالے سے عالمی ورثہ مقامات کے نظم و نسق پر روشنی ڈالی اور تحفظ کے طریقۂ کار، سائٹ مینجمنٹ پلان اور ورثے کی حفاظت سے متعلق تیاریوں پر تفصیلی گفتگو کی۔

فیکلٹی آف لائف سائنسز کے ڈین پروفیسر نفیس احمد خان نے بطور مہمانِ خصوصی ورثہ بیداری کو فروغ دینے میں تحقیق اور عوامی رابطہ سرگرمیوں کی اہمیت کو اجاگر کیا۔

اس سے قبل شعبہ کے صدر اور کنوینر پروفیسر عبدالرحیم کے نے مہمانوں کا خیرمقدم کرتے ہوئے سماجی ترقی میں ورثے کے کردار اور تحفظ سے متعلق جاری تحقیقی کوششوں پر زور دیا۔

پروگرام کے تحت میوزیم کلب کے اشتراک سے ایک آؤٹ ریچ سرگرمی بھی منعقد کی گئی، جس میں اسکولی بچوں کو موسیٰ ڈاکری میوزیم کا رہنمائی کے ساتھ دورہ کرایا گیا، تاکہ ان میں ورثہ کے تحفظ کے تئیں بیداری پیدا کی جا سکے۔پروگرام کا اختتام کنوینر ڈاکٹر دانش محمود کے شکریہ کے کلمات کے ساتھ ہوا، جبکہ اس کی نظامت ڈاکٹر امیزہ زرین نے انجام دی۔

ہندوستھان سماچار

---------------

ہندوستان سماچار / سید کامران علی گڑھ