بھونیشور، 06 مارچ (ہ س)۔ مرکزی وزیر داخلہ امت شاہ نے جمعہ کو کہا کہ ہندوستان 31 مارچ 2026 تک نکسل ازم سے مکمل طور پر آزاد ہو جائے گا۔انہوں نے کہا کہ سیکورٹی فورسز کی مسلسل کارروائیوں اور مرکزی حکومت کے عزم کی وجہ سے ملک اب اس مسئلہ سے آزادی کے آخری مرحلے میں پہنچ گیا ہے۔ منڈولی، کٹک میں سنٹرل انڈسٹریل سیکورٹی فورس (سی آئی ایس ایف) کے 57 ویں یوم تاسیس کی تقریبات سے خطاب کرتے ہوئے شاہ نے کہا کہ مرکزی حکومت ملک سے نکسل ازم کو مکمل طور پر ختم کرنے کے لیے پرعزم ہے۔انہوں نے کہا کہ میں ہم وطنوں کو یقین دلاتا ہوں کہ ہندوستان 31 مارچ تک نکسل ازم سے آزاد ہو جائے گا۔ شاہ نے کہا کہ سیکورٹی فورسز کی مربوط اور مسلسل کارروائیوں کی وجہ سے ملک اب اس دہائیوں پرانے مسئلے سے چھٹکارا پانے کی دہلیز پر ہے۔

انہوں نے یہ بھی کہا کہ نریندر مودی کی زیرقیادت حکومت مقررہ وقت کے اندر نکسل ازم کو ختم کرنے کے لیے پرعزم ہے اور اس سمت میں سی آئی ایس ایف کا کردار اہم رہا ہے۔

شاہ نے کہا، ”اوڈیشہ ہو، چھتیس گڑھ ہو یا تلنگانہ، سی آئی ایس ایف نے نکسلزم کے خلاف لڑائی میں اہم حصہ ڈالا ہے۔“انہوں نے نام نہاد ’ریڈ کوریڈور‘ تصور پر بھی حملہ کرتے ہوئے کہا کہ تروپتی سے پشوپتی تک ریڈ کوریڈور بنانے کا خواب دیکھنے والوں کو سیکورٹی فورسز پوری طرح شکست دیں گی۔ انہوں نے کہا کہ وزیر اعظم نریندر مودی کی قیادت میں ہماری سیکورٹی فورسز اس چیلنج کو مکمل طور پر ختم کر دیں گی جو کہ ایک بڑی کامیابی ہو گی۔قبل ازیں امت شاہ بھونیشور پہنچے، جہاں ان کا استقبال اڈیشہ کے وزیر اعلیٰ موہن ماجھی، نائب وزیر اعلیٰ پربھاوتی پریدا، اور ریاستی بی جے پی صدر منموہن سمل سمیت دیگر رہنماو¿ں نے کیا۔ اس کے بعد وہ سی آئی ایس ایف کے یوم تاسیس کی تقریب میں شرکت کے لیے منڈالی روانہ ہوئے۔اپنے خطاب میں مرکزی وزیر داخلہ نے ملک کی اہم صنعتی اکائیوں اور اداروں کی حفاظت میں سی آئی ایس ایف کے تعاون کی تعریف کی۔

انہوں نے کہا، ’سی آئی ایس ایف کے 57 ویں یوم تاسیس کے موقع پر، میں تمام جوانوں اور ان کے خاندانوں کا شکریہ ادا کرتا ہوں کہ وہ قوم کی سلامتی کے لیے اپنی لگن کا اظہار کرتے ہیں۔ ہندوستان کے لیے دنیا کی ایک سرکردہ معیشت بننے کے لیے صنعتی ترقی ضروری ہے، اور اس ترقی کو محفوظ رکھنے کے لیے ایک قومی سطح کی صنعتی سیکورٹی فورس کی ضرورت ہے۔‘شاہ نے کہا کہ گزشتہ 56 سالوں میں، سی آئی ایس ایف نے نہ صرف اپنی ذمہ داریوں کو مضبوطی سے نبھایا ہے بلکہ بدلتے ہوئے سیکورٹی چیلنجوں کے مطابق خود کو جدید بھی بنایا ہے۔انہوں نے کہا،’بہادری، قربانی اور خود قربانی ہندوستان کی شاندار تاریخ کی پہچان ہیں، ان اقدار کو لگن اور جدید ہتھیاروں کے ساتھ جوڑ کر، سی آئی ایس ایف نے ہر چیلنج کا مقابلہ کرنے کی ہمت کا مظاہرہ کیا ہے۔‘شاہ نے کہا کہ ترقی یافتہ ہندوستان 2047 کے ہدف کو حاصل کرنے اور ملک کی صنعتی توسیع کو محفوظ بنانے میں سی آئی ایس ایف کا کردار اہم رہے گا۔

ہندوستھان سماچار

ہندوستان سماچار / Mohammad Khan