کانپور، 26 مارچ (ہ س)۔ گیس سلنڈروں کی کالا بازاری، اوور ریٹنگ اور غیر قانونی ری فلنگ کے خلاف ضلع بھر میں مسلسل سخت مہم چلائی جا رہی ہے۔ مقررہ قیمت سے زائد وصولی اور گھریلو گیس کی غیر قانونی ری فلنگ کرنے والوں پر کڑی نظر رکھی جا رہی ہے۔ حالیہ کارروائی میں دو مختلف مقامات پر چھاپے مارے گئے اور بڑے معاملے بے نقاب ہوئے جن میں ملزمان کے خلاف ایف آئی آر درج کرنے کی سفارش کی گئی ہے۔ اب تک ایل پی جی سے متعلق مقدمات میں 12 مقدمات درج کیے گئے ہیں اور مزید کارروائی جاری رہے گی۔ ڈسٹرکٹ سپلائی آفیسر (ڈی ایس او) راکیش کمار نے جمعرات کو یہ بات کہی۔

انہوں نے بتایا کہ پہلی کارروائی اشوک نگر میں بابا فاسٹ فوڈ پر کی گئی جہاں کمرشیل گیس سلنڈر کا استعمال کرکے کھانا تیار کیا جارہا تھا۔ جائے وقوعہ سے تین سلنڈر ملے ہیں۔ تحقیقات سے معلوم ہوا کہ ہوٹل آپریٹر اشرف علی نے سلنڈر ایس بی ایسوسی ایٹس ایجنسی سے خریدے تھے اور فی سلنڈر 3500 روپے ادا کیے تھے۔ تاہم، ٹیکس انوائس کے مطابق سلنڈر کی مجازقیمت 2,945.30 روپے ہے۔ اس طرح تقریباً 554.70 روپے فی سلنڈر زیادہ وصولی کی گئی ۔ ٹیم نے قبضہ میں لے کر تینوں سلنڈروں کو بحفاظت واپس کر دیا۔ ایجنسی آپریٹر سچن مشرا اور ہوٹل آپریٹر اشرف علی کے خلاف ضروری اشیاء ایکٹ کی دفعہ 3/7 کے تحت مقدمہ درج کرنے کی سفارش کی گئی ہے۔

دوسری کارروائی کاکادیو علاقے میں کی گئی، جہاں ایک خفیہ اطلاع کی بنیاد پر تلسی نگر روڈ پر واقع ایک کھوکھے پر چھاپہ مارا گیا۔ سمر نامی شخص غیر قانونی طور پر گھریلو ایل پی جی کو چھوٹے، غیر آئی ایس آئی سلنڈروں میں ری فل کر رہا تھا۔ ٹیم نے ایک الیکٹرانک وزنی پیمانہ، نو خالی سلنڈر، ایک بھرا ہوا سلنڈر، ایک ریگولیٹر اور ایک پائپ برآمد کیا۔ برآمد شدہ مواد دیپ گیس ایجنسی کے حوالے کر دیا گیا اور ملزمان کے خلاف ایف آئی آر درج کرنے کی سفارش کی گئی ہے۔ جمعرات کو دونوں معاملات میں ایک مقدمہ درج کیا گیا تھا، جس سے اب تک درج مقدمات کی کل تعداد 12 ہوگئی ہے۔

ہندوستھا ن سماچار

ہندوستان سماچار / محمد شہزاد