ممبئی ، 18 مارچ (ہ س) مہاراشٹر میں راشٹریہ سویم سیوک سنگھ (آر ایس ایس) نے سابق اے ٹی ایس چیف کے پی رگھوونشی کے ان دعوؤں کی تائید کی، جن میں انہوں نے یو پی اے حکومت کے دوران مبینہ دباؤ کا ذکر کیا ہے۔ آر ایس ایس کے نمائندوں نے اس واقعے کو تشویشناک قرار دیتے ہوئے کہا کہ رگھوونشی کا اب اس معاملے پر کھل کر بات کرنا ایک اہم پیش رفت ہے، جو آزادیٔ اظہار کی جانب اشارہ کرتا ہے۔

ممبئی پریس کلب میں میڈیا سے گفتگو کرتے ہوئے آر ایس ایس کے کونکن خطے کے عہدیدار وٹھل راؤ کامبلے نے کہا کہ رگھوونشی کی سوانح عمری میں درج انکشافات اس بات کی علامت ہیں کہ اب ایسے معاملات سامنے لائے جا رہے ہیں جو پہلے دبے ہوئے تھے۔ انہوں نے مزید کہا کہ کسی بھی ایماندار افسر پر دباؤ ڈالنا افسوسناک ہے اور اس طرح کے واقعات کی حقیقت سامنے آنا ضروری ہے۔

رگھوونشی کی کتاب “ٹربل شوٹر”، جسے جتیندر دکشت نے تحریر کیا ہے، میں دعویٰ کیا گیا ہے کہ 2010 میں یو پی اے حکومت کے ایک سینئر وزیر نے انہیں دہلی بلا کر آر ایس ایس سے وابستہ اندریش کمار کو گرفتار کرنے کے لیے دباؤ ڈالا تھا۔ کتاب کے مطابق اس وقت وہ مالیگاؤں دھماکہ کیس کی تحقیقات کی قیادت کر رہے تھے، لیکن انہوں نے ثبوت نہ ہونے کی بنیاد پر گرفتاری سے انکار کیا، جس کے بعد انہیں عہدے سے ہٹا دیا گیا۔

ہندوستھان سماچار

--------------------

ہندوستان سماچار / جاوید این اے